തിരുവനന്തപുരം: ഐക്യരാഷ്ട്ര സംഘടന ജനീവയിൽ സംഘടിപ്പിക്കുന്ന ലോക പുനഃ നിർമാണ സമ്മേളനം ഉൾപ്പെടെയുള്ള പരിപാടികളിൽ പങ്കെടുക്കുന്നതിന് മുഖ്യമന്ത്റി പിണറായി വിജയൻ 8ന് യൂറോപ്പിലേക്ക് യാത്ര തിരിക്കും.
13ന് നടക്കുന്ന പുനഃ നിർമാണ സമ്മേളനത്തിൽ മുഖ്യ പ്രാസംഗകരിൽ ഒരാളാണ് മുഖ്യമന്ത്റി. അമേരിക്കൻ ധനതത്വശാസ്ത്രജ്ഞനും നൊബേൽ സമ്മാന ജേതാവുമായ ജോസഫ് സ്റ്റിഗ് ലിറ്റ്‌സ് ഉൾപ്പെടെയുള്ള പ്രമുഖർ പങ്കെടുക്കും. കേരളം നേരിട്ട മഹാപ്രളയത്തിന്റെ അനുഭവങ്ങൾ മുഖ്യമന്ത്റി പങ്കുവയ്‌ക്കും.
നെതർലാന്റ്‌സിൽ 9 ന് ഐ.ടി മേഖലയിലെ കൂട്ടായ്മയായ ടി.എൻ.ഒ വിന്റെ പ്രതിനിധികളുമായും വ്യവസായ കോൺഫെഡറേഷന്റെ പ്രതിനിധികളുമായും കൂടിക്കാഴ്ചയുണ്ട്.
പ്രളയദുരന്തം നേരിടുന്നതിന് നെതർലാന്റ്‌സ് നടപ്പാക്കിയ 'റൂം ഫോർ റിവർ' പദ്ധതി പ്രദേശം സന്ദർശിക്കും.
10ന് നെതർലാന്റ്‌സ് ജലവിഭവ അടിസ്ഥാനസൗകര്യ വികസന മന്ത്റി കോറ വാനുമായി ചർച്ച നടത്തും. നെതർലാന്റ്‌സിലെ മലയാളി കൂട്ടായ്മയുമായി സംവദിക്കും.
14ന് സ്വിറ്റ്സർലാന്റിലെ ധനകാര്യം, വിദ്യാഭ്യാസം, ടൂറിസം മേഖലകളുടെ ചുമതല വഹിക്കുന്ന ഫെഡറൽ കൗൺസിലർ ഗൈ പാർമീലിനുമായി കൂടിക്കാഴ്ച. സ്വിസ് പാർലമെന്റിലെ ഇന്ത്യൻ അംഗങ്ങളെയും കാണും. കേരളത്തിലേക്ക് വ്യവസായ നിക്ഷേപം ആകർഷിക്കുന്നതിന് സ്വിസ് സംരംഭകരുമായും പ്രവാസി ഇന്ത്യാക്കാരുമായും ചർച്ച നടത്തും.
17ന് ലണ്ടൻ സ്റ്റോക്ക് എക്‌സ്‌ചേഞ്ചിൽ കിഫ്ബിയുടെ മസാല ബോണ്ട് ലിസ്റ്റ് ചെയ്യുന്ന ചടങ്ങിൽ മുഖ്യാതിഥിയായിരിക്കും. കെ.എസ്.എഫ്.ഇയുടെ പ്രവാസി ചിട്ടിയിൽ ബ്രിട്ടനിലെ മലയാളികളെ പങ്കാളികളാക്കും.
ലണ്ടനിലെ പരിപാടികളിൽ ധനമന്ത്റി ഡോ. തോമസ് ഐസക്, കിഫ്ബി ചീഫ് എക്‌സിക്യൂട്ടീവ് ഡോ. കെ.എം. എബ്രഹാം, വ്യവസായ സെക്രട്ടറി ഡോ. ഇളങ്കോവൻ എന്നിവരും പങ്കെടുക്കും.
16ന് പാരിസിൽ പ്രസിദ്ധ സാമ്പത്തിക വിദഗ്ധൻ തോമസ് പിക്കറ്റി, ലൂക്കാസ് ചാൻസൽ എന്നിവരുമായി ചർച്ച നടത്തും.
ചീഫ് സെക്രട്ടറി ടോം ജോസ്, അഡീഷണൽ ചീഫ് സെക്റട്ടറി ഡോ. വിശ്വാസ് മേത്ത, റീബിൽഡ് കേരള ഇനിഷ്യേറ്റീവ് ചീഫ് എക്‌സിക്യൂട്ടീവ് ഡോ. വി. വേണു, ഡിസാസ്റ്റർ മാനേജ്‌മെന്റ് അതോറിറ്റി മെമ്പർ സെക്രട്ടറി ഡോ. ശേഖർ കുര്യാക്കോസ് എന്നിവരും മുഖ്യമന്ത്റിയോടൊപ്പം ഉണ്ടാകും. 20ന് തിരിച്ചെത്തും.