ആ​റ്റിങ്ങൽ : പിറന്നതും വളർന്നതും പഠിച്ചതും ഒരുമിച്ച്. ഒടുവിൽ പ്ളസ് ടു പരീക്ഷാ ഫലം വന്നപ്പോൾ മാർക്കിലുമില്ല വ്യത്യാസം. ഇരട്ടക്കുട്ടികൾക്ക് ഒരേപോലെ ഫുൾ മാർക്ക്. ആ​റ്റിങ്ങൽ ഗവ. മോഡൽ ബോയ്സ് എച്ച്.എസ്.എസിലെ പ്ലസ്ടു സയൻസ് വിഭാഗം വിദ്യാർത്ഥികളായ കൃഷ്ണ ബി. വേണുവും കൃപ വി. വേണുവുമാണ് വിജയത്തിലും ഒരുമ കാട്ടിയത്. പരസ്പരം പഠനത്തിൽ സഹായിക്കും.ഒരു മാർക്കുപോലും വിട്ടുകൊടുക്കരുതെന്ന വാശിയോടെയാണ് പരീക്ഷ എഴുതിയത്. ഫലം വന്നപ്പോൾ നാവായിക്കുളം നെസ്​റ്റിൽ ആറ്റിങ്ങൽ നഗരസഭാ ലൈബ്രറിയിലെ ലൈബ്രേറിയനായ കെ. വേണുവിനും ആറ്റിങ്ങൽ ഡയറ്റ് സ്കൂളിലെ അദ്ധ്യാപികയായ എസ്. ബീനയ്ക്കും മക്കൾ നൽകിയത് ഇരട്ടിമധുരം.പഠന പ്രവർത്തനങ്ങൾക്കൊപ്പം പഠനേതര രംഗത്തും ഇരുവരും മികവ് കാട്ടിയിരുന്നു. കലോത്സവത്തിൽ ഒരുമിച്ച് മത്സരിക്കാൻ കഴിയുന്ന എല്ലാ മത്സരങ്ങളിലും പങ്കെടുക്കും. ഗി​റ്റാർ, വയലിൻ മത്സരങ്ങളിൽ നിരവധി തവണ ജില്ലാതലത്തിൽ ഒന്നാം സ്ഥാനം നേടി. സംസ്ഥാനതലത്തിൽ എ ഗ്രേഡ് സ്വന്തമാക്കി. ശാസ്ത്രമേളയിലെ ശാസ്ത്ര ക്വിസിൽ ജില്ലയിൽ ഒന്നാം സ്ഥാനവും സ്​റ്റേ​റ്റിൽ രണ്ടാം സ്ഥാനവും നേടി.സിവിൽ സർവീസിൽ താത്പര്യമുള്ള ഇരുവരും കഴിഞ്ഞ മെഡിക്കൽ എൻട്രൻസ് പരീക്ഷയും എഴുതിയിട്ടുണ്ട്. ബി. സത്യൻ എം.എൽ.എ വീട്ടിലെത്തി അഭിനന്ദനം അറിയിച്ചു.

ഫോട്ടോ....കൃഷ്ണ ബി. വേണുവും കൃപ ബി. വേണുവും