ജനീവ: ഭാവിയിൽ ഉണ്ടായേക്കാവുന്ന പ്രകൃതി ദുരന്തങ്ങളുടെ ആഘാതം താങ്ങാൻ ശേഷിയുള്ള പുതിയ കേരളത്തിന്റെ നിർമ്മാണമാണ് ലക്ഷ്യമെന്നും ഈ ദൗത്യം ഒരു കർമ്മപദ്ധതിയായാണ് നടപ്പാക്കുന്നതെന്നും മുഖ്യമന്ത്രി പിണറായി വിജയൻ ജനീവയിൽ ഐക്യരാഷ്ട്ര സംഘടനയുടെ അന്താരാഷ്ട്ര പുനർനിർമാണ സമ്മേളനത്തിൽ പറഞ്ഞു.

പ്രകൃതി സൗഹൃദ നിർമ്മാണ രീതികൾ, നദീജലത്തിന്​ കൂടുതൽ ഇടം നൽകുന്ന നയങ്ങൾ, പ്രളയത്തോടൊപ്പം ജീവിക്കുകയും അതിനെ അതിജീവിക്കുകയും ചെയ്യുന്ന ശൈലി എന്നിവയാണ്​ ഈ ദൗത്യത്തിന്റെ മുഖ്യഘടകങ്ങൾ. പുനരധിവാസ പദ്ധതികൾ സമൂഹത്തിൽ ഏ​റ്റവും പിന്നാക്കം നിൽക്കുന്നവരുടെ ഭക്ഷണത്തിനും പാർപ്പിടത്തിനും പരമപ്രാധാന്യം നൽകുന്നതാണ്. 2018ലെ വെള്ളപ്പൊക്കം കേരള സമൂഹത്തിന്റെ ഏ​റ്റവും വലിയ നന്മയെ പുറത്തു കൊണ്ടുവന്നു. സാമൂഹിക, സാമ്പത്തിക വ്യത്യാസങ്ങൾ മറന്ന്​ സാഹോദര്യ മനോഭാവത്തോടെ പരസ്പരം പിന്തുണ നൽകി പ്രകൃതി ദുരന്തത്തെ അതിജീവിച്ചു. ഇത്​ പുനർ നിർമ്മാണ പ്രവർത്തനങ്ങളിലും വേണ്ട ഊർജ്ജം നൽകും.

പ്രളയം മൂലം സംസ്ഥാനത്തിന്റെ മൊത്തം നഷ്ടം 4.4 ബില്യൺ അമേരിക്കൻ ഡോളറാണെന്ന്​ ഐക്യരാഷ്ട്രസഭയുടെ ഏജൻസികളുടെ പഠനത്തിൽ കണ്ടെത്തിയിട്ടുണ്ട്​. കേരളീയ സമൂഹം മഹാപ്രളയത്തെ നിശ്ചയദാർഢ്യത്തോടെയാണ്​ നേരിട്ടത്​. യുവാക്കളും വിദ്യാർത്ഥികളും അസാധാരണമായ ഇച്ഛാശക്തി പ്രകടമാക്കി. കേരള സമൂഹത്തിൽ വേരൂന്നിയ നവോത്ഥാന മൂല്യങ്ങൾ ഉൾക്കൊണ്ടതുകൊണ്ടാണ്​ അവർക്കിത്​ സാദ്ധ്യമായത്​.

പൊതുസമൂഹവും സർക്കാരും പെട്ടെന്ന് ഉണർന്നു പ്രവർത്തിച്ചു. മത്സ്യത്തൊഴിലാളി സമൂഹത്തോട്​ കേരളം പ്രത്യേകം കടപ്പെട്ടിരിക്കുന്നു. അവരുടെ സമയോചിതമായ ഇടപെടൽ ഇല്ലായിരുന്നെങ്കിൽ ഇതിലുമധികം ജീവനുകൾ നഷ്ടമായേനേ. ഉദ്യോഗസ്ഥർക്കൊപ്പം സായുധ സേനാംഗങ്ങളും രക്ഷാപ്രവർത്തനത്തിൽ മുഖ്യപങ്കുവഹിച്ചു.

പൊതുജനങ്ങളുടെയും പ്രവാസി മലയാളികളുടെയും വിവിധ ഏജൻസികളുടെയും സംഭാവനകൾ സംഭരിച്ച് കാര്യക്ഷമമായി വിനിയോഗിക്കാൻ സാധിച്ചു. വൈദ്യുതി വിതരണം റെക്കാഡ്​ സമയത്തിനുള്ളിൽ പുനഃസ്ഥാപിച്ചു. തദ്ദേശ സ്വയംഭരണ സ്ഥാപനങ്ങളുടെയും സിവിൽ സമൂഹത്തിന്റെയും ബഹുജന സംഘടനകളുടെയും പങ്കാളിത്തത്തോടെ ശുചീകരണം നടത്തി. കുടിവെള്ളം, മരുന്ന്, മ​റ്റ്​ അവശ്യ സാധനങ്ങൾ എന്നിവയും ലഭ്യമാക്കി.

വീട് പുനർ നിർമ്മാണം വേഗത്തിൽ

പ്രളയത്തിൽ തകർന്ന വീടുകളുടെ പുനർ നിർമ്മാണത്തിന് സമഗ്ര പദ്ധതി ആവിഷ്​കരിച്ച് വേഗത്തിൽ നടപ്പാക്കുകയാണ്. കേടുപാടുകൾ സംഭവിച്ച വീടുകളും പൂർണമായി തകർന്നവയും കുടുംബാംഗങ്ങളുടെ പങ്കാളിത്തത്തോടെ പുനർ നിർമ്മിക്കാൻ ധനസഹായം നൽകിവരുന്നു. ഗാർഹികോപകരണങ്ങൾ നഷ്​ടപ്പെട്ടവർക്ക്​ അവ വീണ്ടെടുക്കാൻ സഹകരണ,​ വാണിജ്യ ബാങ്കുകളുടെ വായ്​പ ലഭ്യമാക്കി കുടുംബശ്രീ വഴി വിതരണം ചെയ്യാൻ നടപടി സ്വീകരിച്ചു. ഇതിന്റെ പലിശ സർക്കാരാണ് നൽകുന്നത്. ദുരിതബാധിതരായ കുടുംബങ്ങൾക്ക്​ നിലവിലുള്ള തൊഴിൽദാന പദ്ധതികൾ വഴി തൊഴിലവസരങ്ങൾ സൃഷ്​ടിക്കാനും കഴിഞ്ഞെന്നും മുഖ്യമന്ത്റി പറഞ്ഞു.