തിരുവനന്തപുരം: ഔദ്യോഗിക യാത്രകളിൽ ഭാര്യയുടെ ചെലവ് സർക്കാർ വഹിക്കണമെന്ന പി.എസ്.സി ചെയർമാന്റെ ആവശ്യം പൊതുഭരണ വകുപ്പ് തള്ളി. മന്ത്രിമാർക്കില്ലാത്ത സൗകര്യം പി.എസ്.സി ചെയർമാനു നൽകാനാവില്ലെന്നു വകുപ്പ് നിലപാടെടുത്തു. ഇത് രേഖാമൂലം മുഖ്യമന്ത്രിയെ അറിയിക്കും

ഇക്കാര്യം കുറിച്ച ഫയൽ മുഖ്യമന്ത്രിക്കു കൈമാറാനാണ് ജി.എ.ഡിയുടെ നീക്കം. ഒപ്പം വരുന്ന ഭാര്യയുടെ ചെലവ് സർക്കാർ തന്നെ വഹിക്കണമെന്ന് ആവശ്യപ്പെട്ട് പി.എസ്.സി ചെയർമാൻ എം.കെ.സക്കീർ ഏപ്രിൽ 30 നു ഫയലിൽ കുറിച്ചിരുന്നു.

ചെയർമാന്റെ ആവശ്യം സെക്രട്ടറി സാജു ജോർജ് പൊതുഭരണ വകുപ്പിനു കൈമാറുകയായിരുന്നു. നിലവിൽ ഔദ്യോഗിക വാഹനവും ഡ്രൈവറും പെട്രോൾ അലവൻസും ഔദ്യോഗിക വസതിയും ഒന്നര ലക്ഷത്തിലധികം രൂപ ശമ്പളവും ഐ.എ.എസ് ജീവനക്കാരുടേതിനു തുല്യമായ കേന്ദ്ര നിരക്കിലുള്ള ഡി.എയും ചെയർമാന് അനുവദിക്കുന്നുണ്ട്. ഇതിനു പുറമേയാണ് ചെയർമാന്റെ പുതിയ ആവശ്യം.

അതേസമയം, ചെയർമാൻ ചട്ടം ലംഘിച്ച് തൃശൂരിലും തിരുവനന്തപുരത്തുമായി രണ്ടു ഔദ്യോഗിക വാഹനങ്ങൾ ഉപയോഗിക്കുന്നതായി ആരോപണമുയർന്നിട്ടുണ്ട്.