തിരുവനന്തപുരം: ബി.എസ്.എൻ.എൽ കേരളത്തിൽ നടപ്പു സാമ്പത്തിക വർഷം ലക്ഷ്യമിടുന്നത് 20 ലക്ഷം പുതിയ മൊബൈൽ വരിക്കാരെ. പുതിയ ഒരുലക്ഷം ലാൻഡ്‌ലൈൻ ഉപഭോക്താക്കളെയും പ്രതീക്ഷിക്കുന്നു. രണ്ടുലക്ഷം ബ്രോഡ്ബാൻഡ് കണക്ഷനുകളും രണ്ടരലക്ഷം ഫൈബ‌ർ ടു ഹോം (എഫ്.ടി.ടി.എച്ച്) കണക്ഷനുകളും പുതുതായി നൽകുമെന്ന് ബി.എസ്.എൻ.എൽ കേരള സർക്കിൾ ചീഫ് ജനറൽ മാനേജർ ഡോ.പി.ടി. മാത്യു പത്രസമ്മേളനത്തിൽ പറഞ്ഞു.
ലാൻഡ്ഫോൺ, ബ്രോഡ്ബാൻഡ്, എഫ്.ടി.ടി.എച്ച് കണക്ഷനുകൾക്ക് ഇൻസ്‌റ്റലേഷൻ ചാർജ്ജ് ഇല്ല. 235 എക്‌സ്‌ചേഞ്ചുകളിൽ കൂടി വൈ-ഫൈ ഹോട്ട്‌സ്‌പോട്ടുകൾ സ്ഥാപിക്കും. സംസ്‌ഥാനത്തെ 262 ഉപഭോക്തൃ സേവന കേന്ദ്രങ്ങൾ വഴി ഒരുമാസത്തിനകം ആധാർ എൻറോൾ‌മെന്റ് സേവനവും ലഭ്യമാക്കും. പ്രിൻസിപ്പൽ ജനറൽ മാനേജർമാരായ ഡോ.എസ്. ജ്യോതിശങ്കർ, കെ.കുളന്തൈവേൽ, എസ്.എസ്. തമ്പി, സതീഷ് റാം, ജനറൽ മാനേജർമാരായ പി.ജി. നിർമൽ, ആർ. സതീഷ് എന്നിവരും പത്രസമ്മേളനത്തിൽ പങ്കെടുത്തു.
4ജി
നിലവിൽ ഏഴ് ജില്ലകളിലാണ് ബി.എസ്.എൻ.എല്ലിന് 4ജി സേവനമുള്ളത്. കൊച്ചി, തിരുവനന്തപുരം ഉൾപ്പെടെയുള്ള നഗരങ്ങളിലേക്കും സേവനം വ്യാപിപ്പിക്കും. ഇതിനായി 1,791 ബി.ടി.എസുകൾ സ്ഥാപിച്ചിട്ടുണ്ട്. ബി.എസ്.എൻ.എൽ 5ജിയിലേക്ക് കടക്കാനുള്ള സംവിധാനങ്ങൾ നടപ്പാക്കുന്നുണ്ട്.
5 ജിബി പ്രതിദിനം
ദിവസേന അഞ്ചു ജിബി ഡേറ്റ ലഭ്യമാക്കുന്ന ഫ്രീ ട്രയൽ അൺലിമിറ്റഡ് ബ്രോഡ്ബാൻഡ് പ്ളാൻ വഴി നിലവിലെ ലാൻഡ്‌ലൈൻ ഉപഭോക്താക്കൾക്ക് ബ്രോഡ്ബാൻഡ് സേവനം നൽകും. വാർഷിക പ്ളാൻ തിരഞ്ഞെടുക്കുന്ന ലാൻഡ്‌ലൈൻ, ബ്രോഡ്ബാൻഡ്, എഫ്.ടി.ടി.എച്ച് വരിക്കാർക്ക് 25 ശതമാനം കാഷ്‌ബാക്ക് ഓഫറുണ്ട്. നിലവിലുള്ള വരിക്കാർക്കും ഓഫർ ലഭിക്കും.
എസ്.എം.എസ്
കൂടുതൽ എസ്.എം.എസ് സേവനം വേണ്ടവർക്കായി ബൾക്ക് എസ്.എം.എസ് പോർട്ടൽ തുടങ്ങി. എസ്.എം.എസിനായി പുതിയ മൊബൈൽ ആപ്പും പുറത്തിറക്കും.
മറ്ര് സ്‌കീമുകൾ
666 രൂപയ്ക്ക് പ്രതിദിനം 2.5 ജിബി ഡേറ്ര. പരിധിയില്ലാതെ കോളുകൾ. കാലാവധി 134 ദിവസം.
1,699 രൂപയ്ക്ക് പ്രതിദനം 1.5 ജിബി ഡേറ്റയും പരിധിയില്ലാതെ കോളുകളും നൽകുന്ന വാർഷിക മൊബൈൽപ്ളാൻ.
സിംകാർഡ് ഇല്ലാതെ കോളുകൾ വിളിക്കാനും സ്വീകരിക്കാനും സൗകര്യമൊരുക്കുന്ന ബി.എസ്.എൻ.എൽ വിംഗ്സ് ഇന്റർനെറ്റ് ടെലിഫോണി സേവനം.
കോൾ സെന്ററുകൾ ഉൾപ്പെടെയുള്ള സ്ഥാപനങ്ങളിലെ ടെലിഫോൺ ആവശ്യങ്ങൾ നിറവേറ്റാനായി സിപ് ട്രങ്ക് സർവീസ്. കൂടുതൽ കോളുകൾ കുറഞ്ഞനിരക്കിൽ കൈകാര്യം ചെയ്യാം.
ഉപഭോക്താവിന്റെ ആവശ്യാനുസരണം ചാനലുകൾ കൂട്ടാനും കുറയ്ക്കാനും സൗകര്യം.
മൊബൈൽ, ബ്രോഡ്ബാൻഡ്, ഫൈബർടു ഹോം വരിക്കാർക്ക് അധികനിരക്കില്ലാതെ 12 മാസത്തേക്ക് 999 രൂപയുടെ ആമസോൺ പ്രൈം മെമ്പർഷിപ്പ്.