തിരുവനന്തപുരം: ലോക്സഭാ തിരഞ്ഞെടുപ്പിന്റെ വോട്ടെണ്ണലിന് ജില്ലയിൽ ഒരുക്കങ്ങൾ പൂർത്തിയായി. നാലാഞ്ചിറ മാർ ഇവാനിയോസ് വിദ്യാനഗറിലാണ് ജില്ലയിലെ രണ്ടു ലോക്സഭാ മണ്ഡലങ്ങളിലെ വോട്ടുകൾ എണ്ണുന്നത്. നിയമസഭാ മണ്ഡലാടിസ്ഥാനത്തിൽ 14 കേന്ദ്രങ്ങളിലായാണ് വോട്ടെണ്ണൽ. ആറ്റിങ്ങൽ, തിരുവനന്തപുരം ലോക്സഭാ മണ്ഡലങ്ങളിലായി ഏഴു വീതം നിയമസഭാ മണ്ഡലങ്ങളാണുള്ളത്. വർക്കല മണ്ഡലത്തിലെ വോട്ടിംഗ് യന്ത്രങ്ങൾ മാർ ഇവാനിയോസ് കാമ്പസിലെ സർവോദയ വിദ്യാലയ ഓഡിറ്റോറിയത്തിലും ആറ്റിങ്ങൽ മണ്ഡലത്തിലേത് സർവോദയ വിദ്യാലയ ലിറ്റിൽഫ്ളവർ ഓഡിറ്റോറിയം (രണ്ടാം നില), ചിറയിൻകീഴ് മണ്ഡലത്തിലേത് സർവോദയ വിദ്യാലയ ഓഡിറ്റോറിയം, നെടുമങ്ങാട് മണ്ഡലത്തിലെ വോട്ടുകൾ സെന്റ് ജോൺസ് എച്ച്.എസ്.എസ് ഹാൾ, വാമനപുരം മണ്ഡലത്തിലേത് സെന്റ് ജോൺസ് എച്ച്.എസ്.എസ് ഹാൾ, കഴക്കൂട്ടം മണ്ഡലത്തിലേത് സർവോദയ വിദ്യാലയ സെന്റ് പീറ്റേഴ്സ് ബ്ലോക്ക് ഓഡിറ്റോറിയം മെയിൻ ബിൽഡിംഗ്, വട്ടിയൂർക്കാവ് മണ്ഡലത്തിലേത് മാർ തിയോഫിലസ് ട്രെയിനിംഗ് കോളേജ്, തിരുവനന്തപുരം മണ്ഡലത്തിലെ വോട്ടുകൾ മാർ ബസേലിയോസ് എൻജിനിയറിംഗ് കോളേജ് ഓഡിറ്റോറിയം, നേമം മണ്ഡലത്തിലെ വോട്ടുകൾ മാർ തിയോഫിലസ് ട്രെയിനിംഗ് കോളേജ്, അരുവിക്കര മണ്ഡലത്തിലെ വോട്ടുകൾ ജയ് മാതാ ഐ.ടി.സി, പാറശാല മണ്ഡലത്തിലെ വോട്ടുകൾ മാർ ഇവാനിയോസ് കോളേജ് ഓഡിറ്റോറിയം, കാട്ടാക്കട മണ്ഡലത്തിലേത് മാർ ഇവാനിയോസ് കോളേജ് ഓഡിറ്റോറിയം, കോവളം മണ്ഡലത്തിലേത് മാർ ബസേലിയോസ് എൻജിനിയറിംഗ് കോളേജ് ഓഡിറ്റോറിയം, നെയ്യാറ്റിൻകര മണ്ഡലത്തിലെ വോട്ടുകൾ മാർ ഇവാനിയോസ് കോളേജ് ബി.വി.എം.സി ഹാൾ എന്നിങ്ങനെ മാർ ഇവാനിയോസ് കാമ്പസിലെ വിവിധ ഒാഡിറ്റോറിയങ്ങളിലായാണ് നടക്കുക. 23ന് രാവിലെ സ്‌ട്രോംഗ് റൂമിൽനിന്ന് വോട്ടിംഗ് യന്ത്രങ്ങൾ അതതു നിയമസഭാ മണ്ഡലങ്ങൾക്കായി നിശ്ചയിച്ചിട്ടുള്ള ഹാളിലേക്കു മാറ്റും. തിരഞ്ഞെടുപ്പ് നിരീക്ഷകൻ, അസിസ്റ്റന്റ് റിട്ടേണിംഗ് ഓഫീസർ, രാഷ്ട്രീയ പാർട്ടി പ്രതിനിധികൾ എന്നിവരുടെ സാന്നിദ്ധ്യത്തിലാകും യന്ത്രങ്ങൾ പുറത്തെടുക്കുന്നത്. ഓരോ വോട്ടെണ്ണൽ കേന്ദ്രങ്ങളിലും നിശ്ചിത എണ്ണം ടേബിളുകൾ സജ്ജീകരിച്ചിട്ടുണ്ട്. ഓരോ ടേബിളിലും ഒരു മൈക്രോ ഒബ്സർവറും കൗണ്ടിംഗ് സൂപ്പർവൈസറും കൗണ്ടിംഗ് അസിസ്റ്റന്റും ഉൾപ്പെടെ മൂന്നു പേരാണ് ഉണ്ടാകുക. എട്ടരയോടെ ആദ്യ ഫലസൂചന അറിയാനാകുമെന്നാണ് പ്രതീക്ഷ.