*അലോട്ട്‌മെന്റ് വിവരങ്ങൾ www.hscap.kerala.gov.in ൽ.

*ആദ്യലിസ്റ്റ് പ്രകാരമുളള വിദ്യാർത്ഥി പ്രവേശനം 24 മുതൽ 27 വരെ നടക്കും.

*അലോട്ട്‌മെന്റ് ലഭിച്ചവർ നിർബന്ധമായി അലോട്ട്‌മെന്റ് ലഭിക്കുന്ന സ്‌കൂളിൽ 27ന് വൈകിട്ട് നാല് മണിക്ക് മുമ്പ് പ്രവേശനം നേടണം.

*അലോട്ട്‌മെന്റ് ലഭിച്ചിട്ടും താത്കാലിക പ്രവേശനം നേടാത്തവരെ തുടർന്നുളള അലോട്ട്‌മെന്റുകളിൽ പരിഗണിക്കില്ല.

* റീവാലുവേഷനിലൂടെ ലഭിച്ച ഉയർന്ന ഗ്രേഡുകൾ പരീക്ഷാഭവനിൽ നിന്ന് നേരിട്ട് ഉൾപ്പെടുത്തിയാണ് അലോട്ട്‌മെന്റ് നടത്തിയിട്ടുളളത്.

*റീ-വാലുവേഷനിൽ ഗ്രേഡ് വ്യത്യാസം വന്നിട്ടുളളവർ റിസൾട്ടിന്റെ പ്രിന്റ് ഔട്ട് പ്രവേശനസമയത്ത് ഹാജരാക്കണം.

തിരുവനന്തപുരം: പ്ലസ് വൺ പ്രവേശനത്തിന്റെ ആദ്യ അലോട്ട്‌മെന്റ് ലിസ്റ്റ് ഇന്ന് രാവിലെ 10 മണി മുതൽ പ്രവേശനം സാധ്യമാകുന്നവിധം പ്രസിദ്ധീകരിക്കും. ആദ്യ അലോട്ട്‌മെന്റിൽ ഒന്നാമത്തെ ഓപ്ഷൻ ലഭിക്കുന്നവർ ഫീസടച്ച് സ്ഥിരപ്രവേശനം നേടണം. മറ്റ് ഓപ്ഷനുകളിൽ അലോട്ട്‌മെന്റ് ലഭിക്കുന്നവർക്ക് ഇഷ്ടാനുസരണം താത്കാലിക പ്രവേശനമോ സ്ഥിരപ്രവേശനമോ നേടാം. താത്കാലിക പ്രവേശനത്തിന് ഫീസടയ്ക്കേണ്ടതില്ല. താത്കാലികപ്രവേശനം നേടുന്നവർക്ക് ആവശ്യമെങ്കിൽ തിരഞ്ഞെടുത്ത ഏതാനും ഉയർന്ന ഓപ്ഷനുകൾ മാത്രമായി റദ്ദാക്കാം. ഇതിനുളള അപേക്ഷയും പ്രവേശനം നേടുന്ന സ്‌കൂളിലാണ് നൽകേണ്ടത്. ആദ്യ അലോട്ട്‌മെന്റിൽ ഇടം നേടാത്തവർ അടുത്ത അലോട്ട്‌മെന്റുകൾക്കായി കാത്തിരിക്കണം. വിദ്യാർത്ഥികൾക്ക് അപേക്ഷിച്ച ഓരോ സ്‌കൂളിലെയും കാറ്റഗറി തിരിച്ചുളള അവസാന റാങ്ക് വിവരങ്ങൾ പരിശോധിക്കാം. അലോട്ടമെന്റ് ലഭിക്കുന്ന വിദ്യാർത്ഥികളെല്ലാം നിശ്ചിത സമയത്തിനുളളിൽ സ്‌കൂളുകളിൽ പ്രവേശനത്തിന് ഹാജരാകണമെന്നും ഹയർ സെക്കൻഡറി ഡയറക്ടർ അറിയിച്ചു.
രണ്ടാമത്തെ അലോട്ട്‌മെന്റിനുശേഷം ഇതുവരെ അപേക്ഷിക്കാൻ കഴിയാത്തവർക്ക് സപ്ലിമെന്ററി അലോട്ട്‌മെന്റിനായി പുതിയ അപേക്ഷകൾ സ്വീകരിക്കും. സ്‌പോർട്സ് ക്വോട്ട സ്‌പെഷ്യൽ അലോട്ട്‌മെന്റ് റിസൾട്ടും ഇതിനോടൊപ്പം പ്രസിദ്ധീകരിക്കും. അഡ്മിഷൻ 24 മുതൽ 27 വരെ ആയിരിക്കും. വെബ്‌സൈറ്റിൽ അലോട്ട്‌മെന്റ് റിസൽട്ടിനോടൊപ്പം പ്രസിദ്ധീകരിക്കുന്ന നിർദ്ദേശങ്ങളനുസരിച്ച് നിശ്ചിത സമയത്തിനുളളിൽ പ്രിൻസിപ്പൽമാർ പ്രവേശനനടപടികൾ പൂർത്തിയാക്കണമെന്ന് ഹയർ സെക്കൻഡറി ഡയറക്ടർ അറിയിച്ചു.