മുതലകൾ മരം കയറുകയോ..? അത്തരം സംശയങ്ങളുണ്ടെങ്കിൽ അതങ്ങ് മാറ്റിവച്ചേക്കൂ.. ചില ഇനത്തിൽപെട്ട
മുതലകൾക്ക് മരത്തിൽ കയറാനാവുമെന്നാണ് പുതിയ പഠനങ്ങൾ വെളിപ്പെടുത്തുന്നത്. ഇവയ്ക്ക് ദിവസവും ഇത് ചെയ്യാൻ കഴിയുമത്രേ. ആഫ്രിക്ക, ഓസ്ട്രേലിയ, വടക്കേ അമേരിക്ക എന്നിവിടങ്ങളിൽ കാണപ്പെടുന്ന അഞ്ച് വ്യത്യസ്ത ഇനം മുതലകളിൽ നടത്തിയ പഠനങ്ങളിലാണ് അവയ്ക്ക് ആറടിയോളം ഉയരത്തിൽവരെ ഇഴഞ്ഞ് കയറാൻ സാധിക്കും എന്ന് തെളിഞ്ഞത്. കുഞ്ഞ് മുതലകൾക്ക് വേണ്ടിവന്നാൽ 30 അടി ഉയരത്തിൽവരെ കയറാൻ കഴിയും. ചെറിയ മുതലകൾക്ക് കുത്തനെ നിൽക്കുന്ന മരങ്ങളിലും ഇഴഞ്ഞുകയറാനാവും. ശീതരക്തമുള്ള ജീവികളിൽ ശരീര താപനില ക്രമപ്പെടുത്താൻ മരം കയറ്റം സഹായിക്കുമെന്നാണ് ഗവേഷകർ പറയുന്നത്. ഈ പ്രദേശങ്ങളിൽ താമസിക്കുന്നവർക്ക് ഇക്കാര്യം അറിയാമെങ്കിലും ഇതേക്കുറിച്ച് കാര്യമായ പഠനങ്ങളൊന്നും ഇതുവരെ നടന്നിട്ടില്ല.