പാറശാല: 6ന് നടക്കുന്ന സ്കൂൾ പ്രവേശനോത്സവത്തിന് മുന്നോടിയായി ഇന്ന് പാറശാല ഗ്രാമപഞ്ചായത്തിൽ പ്രവേശനോത്സവ വിളംബര കലാജാഥ സംഘടിപ്പിക്കും. പഞ്ചായത്ത് പരിധിയിലെ 19 വിദ്യാലയങ്ങളിലെ അദ്ധ്യാപകരും രക്ഷിതാക്കളും വിദ്യാർത്ഥികളും ജാഥയെ വരവേൽക്കും. പാറശാല ഉപജില്ലയിലെ 71 വിദ്യാലയങ്ങളിലും പ്രവേശനോത്സവം നടക്കും. ഉപജില്ലാതല പ്രവേശനോത്സവം കാരോട് ഗ്രാമപഞ്ചായത്തിലെ അയിര ഗവ.കെ.വി.എച്ച്.എസ്.എസിൽ കെ.ആൻസലൻ എം.എൽ.എ ഉദ്ഘാടനം ചെയ്യും. രക്ഷിതാക്കളും അദ്ധ്യാപകരും പൊതു പ്രവർത്തകരും ജനപ്രതിനിധികളും ചേർന്ന് നവാഗത വിദ്യാർത്ഥികളെ സ്വീകരിക്കും.പ്രവേശനോത്സവത്തിന് മുന്നോടിയായി അദ്ധ്യാപക രക്ഷകർതൃ സമിതികളുടെ നേതൃത്വത്തിൽ വിദ്യാലയവും പരിസരവും ശുചീകരിക്കും. പഞ്ചായത്ത്തല പ്രവേശനോത്സവങ്ങൾ പാറശാലയിൽ ഗവ.എൽ.പി.എസിലും, കുളത്തൂരിൽ വൊക്കേഷണൽ ഹയർ സെക്കൻഡറി സ്കൂളിലും നടക്കും. പാറശാല ബി.ആർ.സി യിൽ നടന്ന പഞ്ചായത്ത് വിദ്യാഭ്യാസ സമിതി യോഗം പാറശാല ഗ്രാമപഞ്ചായത്ത് പ്രസിഡന്റ് എസ്.സുരേഷ് ഉദ്ഘാടനം ചെയ്തു. സ്റ്റാൻഡിംഗ് കമ്മിറ്റി ചെയർമാൻ എം.സെയ്ദലി അദ്ധ്യക്ഷത വഹിച്ചു. ബി.പി.ഒ എസ്.കൃഷ്ണകുമാർ, എ.ഇ.ഒ. സെലിൻ ജോസഫ്,ബി.ആർ സി പരിശീലകൻ എ.എസ് മൻസൂർ എന്നിവർ സംസാരിച്ചു. കുളത്തൂരിൽ നടന്ന പഞ്ചായത്ത് വിദ്യാഭ്യാസ സമിതി യോഗം പ്രസിഡന്റ് ബെൽസി ജയചന്ദ്രൻ ഉദ്ഘാടനം ചെയ്തു. വൈസ് പ്രസിഡന്റ് ഡങ്സ്റ്റൺ സി.സാബു, രാജഅല്ലി, കെ.ലത, ബി.ആർ.സി പരിശീലകൻ ആർ.എസ്.ബൈജുകുമാർ എന്നിവർ സംസാരിച്ചു.