ചേർത്തല: പാചകവാതക സിലിണ്ടറിന്റെ റഗുലേ​റ്ററിൽ നിന്ന് തീപടർന്ന് ചായക്കട കത്തി നശിച്ചു.തണ്ണീർമുക്കം ബണ്ട് ജംഗ്ഷന് പടിഞ്ഞാറുവശത്തെ ചക്കനാട്ട് എൻ.ഹരിദാസിന്റെ കടയാണ് കത്തി നശിച്ചത്. ഇന്നലെ വൈകിട്ട് മൂന്നോടെയാണ് അപകടം. ചേർത്തലയിൽ നിന്ന് അഗ്‌നിശമന സേനയെത്തിയാണ് തീയണച്ചത്. കടയിലുണ്ടായിരുന്ന രണ്ട് സിലിണ്ടറുകളും അഗ്‌നിശമന സേന പെട്ടെന്ന് മാ​റ്റിയതിനാൽ വലിയ ദുരന്തം ഒഴിവായി. പാചകവാതക സിലിണ്ടറിന്റെ റഗുലേ​റ്ററിന്റെ തകരാറാണ് അപകട കാരണമെന്ന് അഗ്നിശമന സേനാധികൃതർ പറഞ്ഞു. കെട്ടിടത്തിനും കേടുപാടുകൾ സംഭവിച്ചു. ഏതാണ്ട് രണ്ട് ലക്ഷത്തോളം രൂപയുടെ നഷ്ടം സംഭവിച്ചതായി അധികൃതർ അറിയിച്ചു.