മൂവാറ്റുപുഴ: നിയോജക മണ്ഡലത്തിൽ എൽദോ എബ്രഹാം എം.എൽ.എ നടപ്പിലാക്കുന്ന സമഗ്ര വിദ്യാഭ്യാസ പദ്ധതിയായ വിദ്യാ ദീപ്തി പദ്ധതിയുടെ ഭാഗമായി മൂവാറ്റുപുഴ നിയോജകമണ്ഡലത്തിലെ പ്രതിഭ സംഗമവും,എം.എൽ.എ അവാർഡ് വിതരണവും ഈമാസം ഏഴിന് രാവിലെ 11 ന് മൂവാറ്റുപുഴ മുനിസിപ്പൽ ടൗൺ ഹാളിൽ റവന്യൂ മന്ത്രി ഇ.ചന്ദ്രശേഖരൻ ഉദ്ഘാടനം ചെയ്യും . എൽദോ എബ്രഹാം എം.എൽ.എ അദ്ധ്യക്ഷത വഹിക്കും. നിയോജക മണ്ഡലത്തിലെ സെക്കൻഡറി, ഹയർ സെക്കൻഡറി, ബോർഡ്, യൂണിവേഴ്‌സിറ്റി പരിക്ഷകളിൽ തിളക്കമാർന്ന വിജയം നേടിയ വിദ്യാർത്ഥികളെഅനുമോദിക്കും. മറ്റു മേഖലകളിലെ മത്സരങ്ങളിൽ വിജയം കൈവരിച്ച പ്രതിഭകൾക്കും എം.എൽ.എ അവാർഡ് നൽകി ആദരിക്കും. സി.ബി.എസ്.ഇ, ഐ.സി.എസ്.ഇ, സംസ്ഥാന സിലബസുകളിൽ പഠിച്ച് എല്ലാ വിഷയങ്ങൾക്കും എ പ്ലസ് നേടിയ വിദ്യാർത്ഥികളെയും യൂണിവേഴ്‌സിറ്റി പരീക്ഷകളിലെ റാങ്ക് ജേതാക്കളെയും അനുമോദിക്കുന്നതിനാണ് ചടങ്ങ് . 100 ശതമാനം വിജയം നേടിയ സ്‌കൂളുകളെയും ഈ അനുമോദിക്കും. മൂവാറ്റുപുഴ നിയോജക മണ്ഡലത്തിൽ ഉൾപ്പെട്ട സ്‌കൂളുകളിൽ പഠിച്ച് എല്ലാ വിഷയങ്ങൾക്കും എ പ്ലസ് വാങ്ങിയ വിദ്യാർത്ഥികളുടെ പട്ടിക അതാത് വിദ്യാലയങ്ങളിൽ നിന്നും ലഭ്യമാക്കിയിട്ടുണ്ട്. ഇതിന് പുറമെ നിയോജകമണ്ഡലത്തിലെ താമസക്കാരും മൂവാറ്റുപുഴ നിയോജകമണ്ഡലത്തിനു പുറത്തുള്ള സ്‌കൂളുകളിൽ പഠിച്ച് എല്ലാ വിഷയങ്ങൾക്കും എ പ്ലസ് നേടിയ കുട്ടികളും മണ്ഡലത്തിൽ ഉൾപ്പെട്ട യൂണിവേഴ്‌സിറ്റി റാങ്ക് ജേതാക്കളും മറ്റു മേഖലകളിലെ മത്സരങ്ങളിൽ വിജയം നേടിയ വ്യക്തികളും അപേക്ഷിക്കണം. അപേക്ഷകൾ ജൂൺ നാലിനകം മൂവാറ്റുപുഴ കച്ചേരിത്താഴത്തുള്ള എം.എൽ.എ ഓഫിസിലും, മൂവാറ്റുപുഴ ബി.ആർ.സിയിലും നേരിട്ട് നൽകാം