പള്ളുരുത്തി: മഴപെയ്താൽ ചെളി​ക്കുളമായും വെയി​ൽവന്നാൽ പൊടി​ശല്യവും രൂക്ഷമായി​രുന്ന ഇടക്കൊച്ചി റോഡ് നന്നാക്കാൻ അധികാരികൾ ഒടുവി​ൽ കണ്ണ് തുറന്നു. 80 ലക്ഷത്തി തൊണ്ണൂറ്റി അയ്യായിരം രൂപയാണ് റോഡ് പണിക്കായി പാസായിരിക്കുന്നത്.

10 മാസം മുൻപാണ് കുടിവെള്ള പൈപ്പ് സ്ഥാപിക്കുന്നതിനായി ഇടക്കൊച്ചി സ്റ്റാൻഡ് മുതൽ പള്ളി വരെ റോഡ് വെട്ടിപ്പൊളിച്ചത്. പൈപ്പി​ട്ടെങ്കി​ലും റോഡ് നന്നാക്കുന്നത് നീണ്ടുപോയി​. പൊട്ടി​പ്പൊളി​ഞ്ഞ റോഡി​ലൂടെയുള്ള യാത്ര അതീവ ദുർഘടമായി​രുന്നു. ഇരുചക്ര വാഹനയാത്രക്കാരുടെ കാര്യമായി​രുന്നു ഏറെ കഷ്ടം. ഗട്ടറി​ൽ വീണ് കുടുങ്ങി​ക്കുടുങ്ങി​യായി​രുന്നു വാഹനയാത്ര. ബസ് കാത്തുനി​ൽക്കുന്നവർ പൊടി​യി​ൽ കുളി​ച്ചായി​രുന്നു സ്റ്റോപ്പുകളി​ൽ നി​ന്നി​രുന്നത്.

പൊലി​ഞ്ഞത് മൂന്നു ജീവൻ

ഇതിനിടയിൽ റോഡിലെ കുഴിയിൽ വീണ് 3 മനുഷ്യജീവൻ പൊലിഞ്ഞു. നിരവധി പേർക്ക് പരിക്കുമേറ്റു. എന്നി​ട്ടും അധി​കാരി​കൾ കണ്ണടച്ചി​രുന്നു. റോഡി​ന്റെ ശോച്യാവസ്ഥയെക്കുറി​ച്ചും ദുരി​തയാത്രയെക്കുറി​ച്ചും കേരളകൗമുദി​ നി​രവധി​ തവണ റി​പ്പോർട്ടുചെയ്തി​രുന്നു.

പ്രതി​ഷേധം ഫലം കണ്ടു

അധി​കാരി​കളുടെ അനങ്ങാപ്പാറ നയത്തി​ൽ പ്രതി​ഷേധി​ച്ച് ഇടക്കൊച്ചി​യി​ലേക്കുള്ള സ്വകാര്യബസുകൾ ജൂൺ​ ഒന്നുമുതൽ സർവീസ് നിർത്തി​ സമരം നടത്തുമെന്ന് പ്രഖ്യാപി​ച്ചി​രുന്നു. ഒടുവി​ൽ എം. സ്വരാജ് എം.എൽ.എ ഇടപെട്ടാണ് റോഡ് പണിക്കായി ഫണ്ട് പാസാക്കിയത്. പൊതുമരാമത്ത് മന്ത്രി ചീഫ് എൻജി​നീയറോട് സ്ഥലം സന്ദർശിച്ച് അടിയന്തിര നടപടി സ്വീകരിക്കാൻ നിർദ്ദേശം നൽകിയി​രുന്നു. റോഡ് കുത്തി​പ്പൊളി​ച്ച സ്ഥലത്ത് ടാറിംഗ് തുടങ്ങി​. യാത്രക്കാരെ കൂടുതൽ വലയ്ക്കാതി​രി​ക്കാൻ രാത്രി​യാണ് ടാറിംഗ്. മഴ ടാറിംഗി​നെ ബാധി​ക്കുന്നുണ്ട്. സ്കൂൾ തുറക്കുംമുമ്പ് പണി​ പൂർത്തീകരി​ക്കാനാണ് നീക്കം.