കൊച്ചി:എറണാകുളം ജില്ലയിൽ നിപ സ്ഥിരീകരിച്ചതോടെ വിവിധ വകുപ്പുകൾ യോജിച്ചു മുൻകരുതൽ ജോലികൾ ഉൗർജിതമാക്കി. വിവിധ വകുപ്പുകളുടെ നിപ പ്രതിരോധം ജില്ലാ കൺട്രോൾ റൂം വഴിയായിരിക്കണമെന്ന് ഇന്നലെ ഗസ്റ്റ് ഹൗസിൽ ചേർന്ന യോഗത്തിൽ ആരോഗ്യമന്ത്രി കെ.കെ. ശൈലജ നിർദേശിച്ചു.

യോഗത്തിലെ തീരുമാനങ്ങൾ

• വനം, മൃഗസംരക്ഷണം, തൊഴിൽ വകുപ്പുകൾ പ്രത്യേകം ശ്രദ്ധ പുലർത്തണം.
• മൃഗസംരക്ഷണ വകുപ്പ് കഴിഞ്ഞ മൂന്നാഴ്ചയ്ക്കിടെയുണ്ടായ അസ്വാഭാവിക സംഭവങ്ങൾ റിപ്പോർട്ട് ചെയ്യണം.
• വീടുകളിൽ നിരീക്ഷണത്തിലുള്ളവരെ ആരോഗ്യപ്രവർത്തകർ എല്ലാ ദിവസവും ഫോൺ മുഖേന ബന്ധപ്പെടും.
• നിരീക്ഷണത്തിലുള്ളവർക്ക് വേണ്ടി 21 ദിവസത്തേക്ക് പ്രത്യേക കർമ്മ പദ്ധതി.
• ജില്ലയിലെ മുഴുവൻ സർക്കാർ ആശുപത്രികളിലെയും ജീവനക്കാർക്ക് ഇന്ന് പരിശീലനം.
• ആയുർവേദ, ഹോമിയോ വകുപ്പുകൾ പനി, മറ്റു ഗുരുതര ലക്ഷണങ്ങളോടെ എത്തുന്നവരെ അലോപ്പതി സംവിധാനത്തിലേക്ക് റഫർ ചെയ്യണം.
• പന്നിവളർത്തു കേന്ദ്രങ്ങളിലും മറ്റും വവ്വാലുകളുമായി നേരിട്ടുള്ള ബന്ധം ഉണ്ടാകാത്ത രീതിയിലുള്ള സുരക്ഷ ഒരുക്കണം.
• ഫാമുകളെ പ്രത്യേകം നിരീക്ഷണത്തിൽ വെക്കണം.
• വനം വന്യജീവി വകുപ്പും നിരീക്ഷണം ശക്തമാക്കണം.

ഇതരസംസ്ഥാന തൊഴിലാളികളിലും നിരീക്ഷണം

ഇതര സംസ്ഥാനത്തൊഴിലാളികൾ താമസിക്കുന്ന സ്ഥലങ്ങളിൽ തൊഴിൽ വകുപ്പ് നിരീക്ഷണം ശക്തമാക്കും. ഒന്നിടവിട്ട ദിവസങ്ങളിൽ ഇവരുടെ ക്യാമ്പുകൾ സന്ദർശിച്ച് രോഗലക്ഷണങ്ങളുണ്ടോയെന്ന് പരിശോധിക്കും. അവരുടെ ഭാഷയിൽ ബോധവത്കരണ പോസ്റ്ററുകൾ പ്രദർശിപ്പിക്കും.