ആലുവ: വൈ.എം.സി.എ ശതോത്തര പ്ലാറ്റിനം ജൂബിലിയുടെ ഭാഗമായി ദേശീയ വൈ.എം.സി.എയുടെ ആഘോഷം ഇന്നാരംഭിക്കും. തോട്ടുമുഖം വൈ.എം.സി.എ ക്യാമ്പ് സൈറ്റിൽ രാവിലെ 10.30ന് ബസേലിയോസ് തോമസ് പ്രഥമൻ ബാവ സമ്മേളനം ഉദ്ഘാടനം ചെയ്യും. ഭാരത വൈ.എം.സി.എ. പ്രസിഡന്റ് ജസ്റ്റിസ് ബെഞ്ചമിൻ കോശി അദ്ധ്യക്ഷത വഹിക്കും. ശതോത്തര പ്ലാറ്റിനം ജൂബിലിയുടെ ഭാഗമായി രാജ്യത്ത് നടത്തുന്ന അഞ്ചിന പരിപാടി ജസ്റ്റിസ് ബെഞ്ചമിൻ കോശി പ്രഖ്യാപിക്കും. എക്യുമെനിക്കൽ പ്രാർത്ഥനയ്ക്ക് എറണാകുളം വൈ.എം.സി.എ. ജനറൽ സെക്രട്ടറി എൻ.പി. എൽദോ നേതൃത്വം നൽകും. വൈ.എം.സി.എ.യുടെ 175 വർഷം ചരിത്രത്തിന്റെ നാൾ വഴികൾ എന്ന വിഷയത്തെ ആസ്പദമാക്കി പ്രൊഫ.പി.ജെ. ഉമ്മൻ ജന്മദിന സന്ദേശം നൽകും. ഗാന്ധിയൻ എം.പി. മത്തായി മുഖ്യപ്രഭാഷണം നടത്തും.