മൂവാറ്റുപുഴ: പരീക്ഷകളിൽ മാത്രമല്ല ജീവിതത്തിലും എ പ്ലസ് വിജയങ്ങൾ നേടാൻ കഴിയുന്നവരെയാണ് സമൂഹത്തിന് ഇന്നാവശ്യമെന്ന് മന്ത്രി ഇ. ചന്ദ്രശേഖരൻ പറഞ്ഞു. മൂവാറ്റുപുഴ എം.എൽ.എ എൽദോ എബ്രഹാം നടപ്പാക്കുന്ന വിദ്യാദീപ്തി പ്രതിഭാസംഗമം ഉദ്ഘാടനം ചെയ്യുകയായിരുന്നു മന്ത്രി.
പരീക്ഷകളിൽ മാത്രം എ പ്ലസ് നേടി എന്നതുകൊണ്ട് വിജയിച്ചെന്ന് കരുതരുത്. സമൂഹത്തോടും രാജ്യത്തോടും ഉത്തരവാദിത്വമുള്ളവരായി വളരാൻ കഴിയുമ്പോഴാണ് വിജയം പൂർണമാകുന്നത്. കാമ്പസുകളിലും വിദ്യാലയങ്ങളിലും അപകടകരമായ പ്രവണതകൾ വളരുന്നുണ്ട്. ഇതിനെ പ്രതിരോധിക്കാൻ സാമൂഹികവും വ്യക്തിപരവുമായ അച്ചടക്കം പാലിക്കാൻ കഴിയണമെന്നും മന്ത്രി പറഞ്ഞു. യോഗത്തിൽ എൽദോ എബ്രഹാം എം.എൽ.എ അദ്ധ്യക്ഷനായിരുന്നു.
മൂവാറ്റുപുഴ നിയോജക മണ്ഡലത്തിൽ എസ്.എസ്.എൽ.സി, പ്ലസ്ടു പരീക്ഷകളിൽ എ.പ്ലസ് നേടിയ മുഴുവൻ വിദ്യാർത്ഥികൾക്കും ഉപഹാരം നൽകി. സ്‌കോളർഷിപ്പ് പരീക്ഷാ വിജയികൾ, വിവിധ കോളേജുകളിൽ മികവുറ്റ വിജയം നേടിയവർ, അദ്ധ്യാപക അവാർഡ് ജേതാക്കൾ എന്നിവരെയും നൂറുശതമാനം വിജയം നേടിയ വിദ്യാലയങ്ങളെയും ആദരിച്ചു.
മുനിസിപ്പൽ ചെയർപേഴ്‌സൺ ഉഷ ശശിധരൻ, ബ്ലോക്ക് പഞ്ചായത്ത് വൈസ് പ്രസിഡന്റ് സുഭാഷ് കടയ്ക്കാട്ട്, നഗരസഭാ വൈസ് ചെയർമാൻ പി.കെ. ബാബുരാജ്, നഗരസഭാ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എം.എ. സഹീർ, പഞ്ചായത്ത് പ്രസിഡന്റുമാരായ വള്ളമറ്റം കുഞ്ഞ്, ലത ശിവൻ, ജോഷി സ്‌കറിയ, എൻ.ജെ. ജോർജ്, ഷീന സണ്ണി, ശാന്തി എബ്രാഹം, കോ ഓഡിനേറ്റർ സി.ആർ. ജനാർദ്ദനൻ, എം.ആർ. പ്രഭാകരൻ, വിദ്യാഭ്യാസ വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.