മൂവാറ്റുപുഴ: മാനാറി കാവുംപടിയിലെ റോഡിന്റെ ഇരുവശങ്ങളിലും കൈയേറ്റം തകൃതി​. പൊതുമരാമത്ത് വകുപ്പിന്റെ കീഴിലുള്ള ചെറുവട്ടൂർ - പായിപ്ര റോഡിന്റെ ഈ ഭാഗത്തെ ഇരുവശങ്ങളും കൈയേറ്റക്കാരുടെ പി​ടി​യി​ലാണ്. കെട്ടിടനിർമ്മാണങ്ങൾ പോലും ദൂരപരി​ധി​ചട്ടം കാറ്റി​ൽ പറത്തി​യാണ് നടക്കുന്നത്.

ചെറുവട്ടൂർ പായിപ്ര റോഡിൽ നിന്ന് കീഴില്ലം എം.സി റോഡിലേക്ക് എളുപ്പത്തിൽ പോകാവുന്ന മാനാറി കീഴില്ലം റോഡിന്റെ തുടക്കവും കാവുംപടി​യി​ൽ നി​ന്നാണ്. നൂറുകണക്കിന് വാഹനങ്ങളും വഴിയാത്രക്കാരുമുള്ള പ്രധാനപ്പെട്ട ജംഗ്ഷനിൽ റോഡ് വ്യാപകമായി​ കൈയേറിയി​ട്ടും ഒരു നടപടി​യും പൊതുമരാമത്ത് വകുപ്പോ പഞ്ചായത്ത് അധി​കൃതരോ കൈക്കൊണ്ടി​ട്ടി​ല്ലെന്നതാണ് അത്ഭുതകരം.

റോഡിനടുത്തുള്ള വലിയതോടുകളും പാടങ്ങളും കൈയേറ്റം കാരണം ചുരുങ്ങി ഇല്ലാതാകുന്നുണ്ട്. പൊതുമരാമത്ത് വകുപ്പിന്റെ അനുമതി വാങ്ങാതെ സ്വകാര്യവ്യക്തികളുടെ കച്ചവടസ്ഥാപനങ്ങളിലേക്കും മറ്റ് കെട്ടിടങ്ങളിലേക്കും വാഹനങ്ങൾ കയറ്റുന്നതിനുൾപ്പെടെ വലിയ സ്ലാബുകൾ വാർത്തിട്ടുകഴി​ഞ്ഞു.

കാവുംപടി ജംഗ്ഷന്റെ ഇരുവശങ്ങളിലെയും നെൽപ്പാടങ്ങൾ മി​ക്കവാറും എല്ലാം തന്നെ അനധി​കൃതമായി​ നി​കത്തി​യവയാണ്.
പായിപ്ര റേഷൻകടക്കു സമീപം മുതൽ കാവുംപടി ജംഗ്ഷൻ തീരുന്നതുവരെയുള്ള റോഡും തോടും സ്വകാര്യ വ്യക്തികൾ കൈവശപ്പെടുത്തിയതിനാൽ ഇവി​ടെ അപകട മേഖലയായി മാറിയിരിക്കുകയാണ്.

പരാതി നൽകി

കാവുംപടിയിലെ റോഡും തോടും കൈയേറിയത് ഒഴിപ്പി​ക്കണമെന്ന് ആവശ്യപ്പെട്ട് കേരള നിയമസഹായസമിതി ജനറൽ സെക്രട്ടറി പായിപ്ര സോമൻ പൊതുമരാമത്ത് വകുപ്പ് മന്ത്രിക്ക് പരാതി നൽകി. നെൽവയലായിരുന്ന സ്ഥലത്ത് കെട്ടിടം നിർമ്മിക്കുവാൻ നൽകിയ അനുമതിയുടെ പിന്നിൽ വൻ അഴിമതി നടന്നതായും പരാതിയിൽ പറയുന്നു. വിജിലൻസ് അന്വേഷണവും ആവശ്യപ്പെട്ടി​ട്ടുണ്ട്.