ദുബായ് രാജ്യാന്തര ഗെയിംസിൽ പങ്കെടുക്കും

ആലുവ: യുണൈറ്റഡ് നാഷണൽ ഗെയിംസിൽ 65+ വിഭാഗത്തിൽ കേരളത്തെ പ്രതിനിധീകരിച്ച ആലുവ സ്വദേശി ജോസ് മാവേലി മൂന്ന് സ്വർണ മെഡലുകൾ നേടി വീണ്ടും ദേശീയ ചാമ്പ്യനായി. പങ്കെടുത്ത മൂന്ന് വിഭാഗങ്ങളിൽ 100 മീറ്റർ 14.1 സെക്കന്റിലും 200 മീറ്റർ 29.5 സെക്കന്റിലും 400 മീറ്റർ 68.3 സെക്കൻഡിലും ഓടിയെത്തി സ്വർണമെഡൽ കരസ്ഥമാക്കിയത്. സെപ്തംബറിൽ ദുബായിൽ നടക്കുന്ന രാജ്യാന്തര ഗെയിംസിൽ പങ്കെടുക്കാനും യോഗ്യത നേടി.

ഗോവയിലാണ് ആറാമത് യുണൈറ്റഡ് നാഷണൽ ഗെയിംസ് നടന്നത്. 2011-ൽ ചണ്ഡീഗഢ് നാഷണൽ മാസ്റ്റേഴ്‌സ് മീറ്റിൽ 100, 200 മീറ്റർ ഓട്ടത്തിലും 300 മീറ്റർ ഹർഡിൽസിലും സ്വർണം നേടി ഇന്ത്യൻ ചാമ്പ്യനുമായിട്ടുണ്ട്.
തെരുവിൽ അലയുന്ന കുട്ടികൾക്കുവേണ്ടി പ്രവർത്തിക്കുന്ന ജനസേവ ശിശുഭവന്റെ സ്ഥാപകനും മുൻചെയർമാനുമായിരുന്നു ജോസ് മാവേലി. 2008ൽ ജനസേവ സ്‌പോട്‌സ് അക്കാദമി എന്ന സ്ഥാപനവും അദ്ദേഹം ആരംഭിച്ചു. ഇതിലൂടെ നിരവധി കുട്ടികൾ വിവിധ കായിക വിഭാഗങ്ങളിൽ ജില്ലാ- സംസ്ഥാന തലത്തിൽ മികവു പുലർത്തി.