ആലുവ: സഹകരണ വകുപ്പ് കെയർ ഹോം പദ്ധതി പ്രകാരം പ്രളയത്തിൽ വീട് നഷ്ടപ്പെട്ടവർക്കായി ആലുവ സഹകരണ കാർഷിക ഗ്രാമവികസന ബാങ്ക് നിർമ്മിച്ചു നൽകുന്ന രണ്ടാമത്തെ ഭവനത്തിന്റെ താക്കോൽദാനം ബെന്നി ബെഹനാൻ എം.പി, അൻവർ സാദത്ത് എം.എൽ.എ എന്നിവർ ചേർന്ന് തങ്കമ്മ കണ്ണന് നൽകി നിർവഹിച്ചു.
കേവലം അഞ്ചുമാസം കൊണ്ട് വീടുപണി പൂർത്തിയാക്കൽ ഒരു വെല്ലുവിളി ആയിരുന്നെങ്കിലും എല്ലാവരുടേയും സഹകരണത്താലാണ് അതിന് സാധിച്ചതെന്ന് അദ്ധ്യക്ഷത വഹിച്ച ബാങ്ക് പ്രസിഡൻറ് കെ.കെ. ജിന്നാസ് പറഞ്ഞു. ആലുവ അസി.രജിസ്ട്രാർ എൻ.വിജയകുമാർ മുഖ്യപ്രഭാഷണം നടത്തി. വീടുപണിയുടെ പ്രധാന ചുമതലക്കാരൻ ജോർജ്ജ് പി. അരീക്കൽ, ആലുവ നഗരസഭ വൈസ് ചെയർപേഴ്‌സൺ സി. ഓമന, നെടുമ്പാശേരി പഞ്ചായത്ത് മുൻ പ്രസിഡൻറ് പി.വി. വർഗീസ്, ജില്ല പഞ്ചായത്ത് അംഗം സരള മോഹൻ, ബ്ലോക്ക് അംഗം ഷിബു മൂലൻ, ബാങ്ക് സെക്രട്ടറി ലിജി പി. സ്‌കറിയ, കെ.വി. ജോണി, കെ.പി. പോളി, എൻ.കെ. രതീഷ് ബാബു എന്നിവർ സംസാരിച്ചു.