വൈപ്പിൻ: സ്റ്റേറ്റ് ബാങ്ക് ഒഫ് ഇന്ത്യയുടെ പുതുവൈപ്പ് ശാഖയോട് ചേർന്ന എ.ടി.എമ്മിൽ കവർച്ചാശ്രമം നടത്തി​ യുവാവ് പി​ടിയി​ലായി​. ശനിയാഴ്ച പുലർച്ചെ 2..45 നാണ് സംഭവം.

മുംബായിൽ നിന്നുള്ള സന്ദേശം ലഭിച്ചയുടൻ പൊലീസിന്റെ അടിയന്തിര ഇടപെടലിലാണ് എടവനക്കാട് അണിയൽ സ്വദേശിയായ നികത്തുതറ ആദർശ് (20) അറസ്റ്റിലായത്.

കോടാലി കൊണ്ട് എ.ടി.എം കൗണ്ടർ വെട്ടിപ്പൊളി​ക്കുകയായി​രുന്നു. മുംബായിൽ നിന്ന് സന്ദേശം ലഭിച്ച് പത്തു മിനിറ്റിനകം ഞാറക്കൽ എസ്.ഐ സംഗീത് ജോബും സംഘവും സ്ഥലത്തെത്തിയപ്പോൾ മുക്കാൽ ഭാഗത്തോളം വെട്ടിപ്പൊളിച്ച ശേഷം ആരെങ്കിലും വരുന്നുണ്ടോയെന്ന് നോക്കാൻ ആദർശ് പുറത്തേക്കിറങ്ങുകയായി​രുന്നു. ജീപ്പ് കണ്ടയുടൻ ഇയാൾ ഓടി രക്ഷപ്പെട്ടു. പരിസരത്തെ വീട്ടിലെ ടെറസിലെ വെള്ളം ഇല്ലാത്ത വാട്ടർ ടാങ്കിൽ നി​ന്ന് അപ്പോൾ തന്നെ പി​ടികൂടുകയും ചെയ്തു. ഒരു ലക്ഷത്തോളം രൂപ എ.ടി.എമ്മിൽ ഉണ്ടാകുമെന്നാണ് ബാങ്ക് അധികൃതരുടെ കണക്ക് കൂട്ടൽ. എ.ടി.എം പൊലീസ് സീൽ ചെയ്തു.

സി.ഐ എം.കെ മുരളി, എസ്.ഐ സംഗീത് ജോബ്, എ.എസ്. ഐ ഷംസുദീൻ, മനോജ്, മിറാഷ്, ശിവദാസ്, പ്രവീൺദാസ്, ബിനു എന്നിവർ പൊലീസ് സംഘത്തിലുണ്ടായിരുന്നു.

ബൈക്ക് വാങ്ങിച്ച കടം തീർക്കാനായിരുന്നു കവർച്ചാശ്രമെന്ന് പ്രതി മൊഴി നല്കി.ഇയാളെ വൈകി​ട്ട് കോടതി​യി​ൽ ഹാജരാക്കി​.