കഞ്ഞിക്കുഴി: എസ്.എൻ.ഡി.പി യോഗം തൊടുപുഴ യൂണിയന്റെ കീഴിലുള്ള കഞ്ഞിക്കുഴി നങ്കിസിറ്റി ശ്രീനാരായണ ഹൈസ്‌കൂളിന്റെ പുതിയ മന്ദിര ശിലാസ്ഥാപനം ഇന്ന് 10.30ന് എസ്.എൻ ഹൈസ്‌കൂളിൽ യോഗം ജനറൽ സെക്രട്ടറി വെള്ളാപ്പള്ളി നടേശൻ നിർവഹിക്കും. ചടങ്ങിൽ തൊടുപുഴ യൂണിയൻ ചെയർമാൻ എ.ബി. ജയപ്രകാശ് അദ്ധ്യക്ഷത വഹിക്കും. ക്ഷേത്രം മേൽശാന്തി വൈക്കം ബെന്നിശാന്തി ഭദ്രദീപം തെളിക്കും. തുടർന്ന് ഹൈസ്‌കൂൾ മന്ദിരത്തിന്റെയും എസ്.എൻ യു.പി സ്‌കൂൾ മന്ദിരത്തിന്റെയും ശ്രീനാരായണ ഗുരുദേവ ക്ഷേത്രത്തിന്റെയും ശിലാസ്ഥാപനം എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ നിർവഹിക്കും. ചടങ്ങിൽ സ്‌കൂൾ കോളേജ് പരീക്ഷകളിൽ ഉന്നത വിജയം കരസ്ഥമാക്കിയ കുട്ടികളെ യൂണിയൻ അഡ്മിനിസ്‌ട്രേറ്റീവ് കമ്മിറ്റി അംഗവും സ്‌കൂൾ മാനേജരുമായ സി.പി. സുദർശനൻ ആദരിക്കും. എസ്.എൻ.ഡി.പി യോഗം അസി. സെക്രട്ടറി ഷാജി കല്ലാറയിൽ ആമുഖ പ്രഭാഷണം നടത്തും. യോഗം ഡയറക്ടർ ജയേഷ്. വി മുഖ്യപ്രഭാഷണം നടത്തും. ഇടുക്കി യൂണിയൻ സെക്രട്ടറി സുരേഷ് കോട്ടയ്ക്കകത്ത്, കഞ്ഞിക്കുഴി പഞ്ചായത്ത് പ്രസിഡന്റ് രാജേശ്വരി രാജൻ, പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്‌സൺ പുഷ്പാ ഗോപി, കഞ്ഞിക്കുഴി എസ്.എൻ.എച്ച്.എസ്.എസ് പ്രിൻസിപ്പൽ എൻ.എം. ജിജിമോൾ, കഞ്ഞിക്കുഴി എസ്.എൻ.വി.എച്ച്.എസ്.എസ് പ്രിൻസിപ്പൽ എം.ബി. ബൈജു, ശാഖാ പ്രസിഡന്റും യു.പി സ്‌കൂൾ മാനേജരുമായ ശിവദാസ് പി.വി, ശാഖാ സെക്രട്ടറി അജയ്.എസ്, പി.ടി.എ പ്രസിഡന്റ് വിജയൻ കല്ലുതൊണ്ടിൽ, എം.പി.ടി.എ പ്രസിഡന്റ് ജാസ്മിൻ ജോൺസൺ, പൂർവ്വ വിദ്യാർത്ഥി സംഘടനാ പ്രസിഡന്റ് സേവ്യർ തോമസ്, സ്‌കൂൾ ലീഡർ അലീന വിൻസെന്റ് എന്നിവർ സംസാരിക്കും. തൊടുപുഴ യൂണിയൻ കൺവീനർ ഡോ. കെ.സോമൻ സ്വാഗതവും ഹെഡ്മിസ്ട്രസ് ഇൻ ചാർജ്ജ് ടി.കെ. ഉഷ നന്ദിയും പറയും.

1001 കുട്ടികൾ ദൈവദശകം ആലപിക്കും
ശ്രീനാരായണഗുരുദേവൻ രചിച്ച പ്രാർത്ഥനാ ഗീതമായ ദൈവദശകം 1001 കുട്ടികൾ ഒരുമിച്ച് ആലപിക്കുന്ന ചരിത്രനിമിഷത്തിന് കഞ്ഞിക്കുഴി സാക്ഷിയാകും. തൊടുപുഴ യൂണിയൻ കീഴിലെ കുമാരിസംഘത്തിൽ നിന്നുള്ള മിടുക്കികളാണ് ഉദ്ഘാടനചടങ്ങിന് മുമ്പ് ദൈവദശകം ആലപിക്കുക. ഇത്രയും കുട്ടികൾ ഒരുമിച്ച് ദൈവദശകം ആലപിക്കുന്നത് ജില്ലയിൽ ആദ്യമാകും. വെങ്ങല്ലൂർ ഐ.ടി.ഐയുടെ ഉദ്ഘാടനത്തോടനുബന്ധിച്ച് ഒന്നിന് 501 കുട്ടികൾ ദൈവദശകം ആലപിച്ചിരുന്നു.