ഇടുക്കി: അടിമാലി പഞ്ചായത്തിലെ 21 വാർഡുകളെ പരപസ്പരം കോർത്തിണക്കി ഉത്തരവാദിത്വ ടൂറിസം നടപ്പിലാക്കുന്നതിനു മുന്നോടിയായി ജനപ്രതിനിധികളുടെയും വിവിധ സംഘടനാ പ്രതിനിധികളുടെയും അവലോകന യോഗം ചേർന്നു. മേഖലയിലെ വിനോദ സഞ്ചാര സാധ്യതകൾ പൂർണമായും പ്രയോജനപ്പെടുത്തുകയും അതിലൂടെ കാർഷിക വ്യവസായിക മേഖലയ്ക്ക് കരുത്തു പകരുകയുമാണ് പദ്ധതിയിലൂടെ ലക്ഷ്യമിടുന്നത്. ഗോത്രമേഖലകളിലടക്കമുള്ള വിനോദസഞ്ചാരയിടങ്ങൾ കണ്ടെത്തുന്നതിനും അതത് സ്ഥലങ്ങളിലെ പ്രത്യേകതകളും താമസസൗകര്യങ്ങളും ജില്ലയിലെത്തുന്ന വിനോദസഞ്ചാരികൾക്ക് പരിചയപ്പെടുത്തുന്നതിനും പഞ്ചായത്ത് നടപടി സ്വീകരിക്കും. ഏകീകൃത നിരക്കിൽ കർഷകർക്ക് അവരവരുടെ ഉത്പന്നങ്ങൾ വിനോദസഞ്ചാരികൾക്ക് നേരിട്ട് വിൽപ്പന നടത്താനും അതുവഴി കാർഷിക മേഖലയുടെ ഉണർവിനുള്ള സാധ്യതകളും പഞ്ചായത്ത് പരിശോധിച്ചു വരികയാണ്. സാഹസിക വിനോദ സഞ്ചാരം, ഗോത്രമേഖലകളിലേക്കുള്ള ട്രെക്കിംഗ്, ഫാം ടൂറിസം ഹൈറേഞ്ചിന്റെ തനി നാടൻ ഭക്ഷണ രീതികൾ തുടങ്ങിയവയുൾപ്പെടുത്തിയാണ് പദ്ധതി നടപ്പിലാക്കുക. മൂന്നാറിലേക്കടക്കം എത്തുന്ന വിനോദസഞ്ചാരികളെ അടിമാലി പഞ്ചായത്തിലെ പുതിയ വിനോദ സഞ്ചാര ഇടങ്ങളിലേക്കുകൂടി എത്തിക്കുന്നതിനുള്ള വിവിധ നിർദ്ദേശങ്ങൾ യോഗത്തിൽ ഉന്നയിച്ചു. 14 ന് ചേരുന്ന യോഗത്തിൽ മാസ്റ്റപ്ലാൻ തയ്യാറാക്കുന്നതു സംബന്ധിച്ച് അന്തിമ തീരുമാനം ഉണ്ടാകും. പുതുതായി കണ്ടെത്തുന്ന വിനോദ സഞ്ചാര കേന്ദ്രങ്ങളെ കൂടുതൽ പേരിലേക്ക് എത്തിക്കുന്നതിന്റെ ഭാഗമായി ഫോട്ടോഗ്രാഫി മത്സരം, ടൂറിസം സെമിനാർ എക്‌സിബിഷൻ തുടങ്ങിയവയും സംഘടിപ്പിക്കാൻ യോഗത്തിൽ തീരുമാനമായി.