ഇടുക്കി: കുടുംബശ്രീ അംഗങ്ങൾക്ക് ഇൻഷുറൻസ് പരിരക്ഷ ഉറപ്പാക്കുന്ന സ്ത്രീ സുരക്ഷാ ബീമായോജന പദ്ധതിയിലേക്കുള്ള രജിസ്‌ട്രേഷൻ ആരംഭിച്ചു. കുടുംബശ്രീയിൽ അംഗത്വമുള്ള എല്ലാ അയൽക്കൂട്ടം അംഗങ്ങളും കുടുംബശ്രീ വഴി നടപ്പിലാക്കുന്ന ഈ ഇൻഷുറൻസ് പദ്ധതിയിൽ അംഗത്വം സ്വീകരിക്കണം. കുടുംബശ്രീയും ലൈഫ് ഇൻഷുറൻസ് കോർപ്പറേഷനും സംയുക്തമായാണ് പദ്ധതി നടപ്പിലാക്കുന്നത്. അയൽക്കൂട്ടം അംഗങ്ങളായ വനിതകളുടെ ജീവന് പരിരക്ഷ നൽകുക, അവരുടെ ഒമ്പതു മുതൽ 12 ക്ലാസു വരെ പഠിക്കുന്ന 2 കുട്ടികൾക്ക് പ്രതിവർഷം സ്‌കോളർഷിപ്പ് ലഭ്യമാക്കുക തുടങ്ങിയവയാണ് പദ്ധതിയുടെ ലക്ഷ്യം. 2019 ജൂലായ് ഒന്ന് മുതൽ 2020 മേയ് 31 വരെയാണ് ഇൻഷുറൻസ് പരിരക്ഷ ലഭിക്കുന്നത്. സ്വാഭാവിക മരണത്തിന് രണ്ടു ലക്ഷം രൂപ വരെയും അപകട മരണത്തിന് നാലു ലക്ഷം രൂപ വരെയും ഇൻഷുറൻസ് ലഭിക്കും. കൂടാതെ അപകടം മൂലം സംഭവിക്കുന്ന അംഗവൈകല്യത്തിനും രണ്ട് ലക്ഷം രൂപ വരെ പരിരക്ഷ ലഭിക്കും. 18 മുതൽ 75 വരെ പ്രായമുള്ള അയൽക്കൂട്ടം അംഗങ്ങൾക്കാണ് അവസരം. വാർഷിക പ്രീമിയമായ 342 രൂപയിൽ 181 രൂപയാണ് അടയ്ക്കേണ്ടത്. 51 മുതൽ 75 വരെ പ്രായമുള്ളവർ 160 രൂപ മാത്രമടച്ചാൽ മതി. ശേഷിച്ച തുക കേന്ദ്രസർക്കാർ വിഹിതമാണ്. അപേക്ഷ സ്വീകരിക്കുന്ന അവസാന തീയതി ജൂലായ് 20. കൂടുതൽ വിവരങ്ങൾക്കും അപേക്ഷ സമർപ്പിക്കുതിനും അതത് തദ്ദേശ ഭരണ പ്രദേശത്തുള്ള കുടുംബശ്രീ സിഡിഎസ് ഓഫീസുമായി ബന്ധപ്പെടുക.