കാസർകോട്: കനേഡിയൻ വിസ വാഗ്ദാനം ചെയ്തു തൊഴിൽരഹിതരായ 13 യുവാക്കളിൽ നിന്നും അരക്കോടിയിലധികം രൂപ തട്ടി മുങ്ങിയ തിരുവനന്തപുരം സ്വദേശിയെ കണ്ടെത്താൻ ബദിയടുക്ക പൊലീസ് അന്വേഷണം തുടങ്ങി. നീർച്ചാൽ സ്വദേശികളായ രവിചന്ദ്ര, ഗണേശ, ശ്രീകാന്ത്, അഭിലാഷ്, മനോഹര എന്നിവർ നൽകിയ പരാതിയിൽ തിരുവനന്തപുരം സ്വദേശി മജീഷ് മനോഹർ (30) എന്നയാൾക്കെതിരെ ആണ് ബദിയടുക്ക പൊലീസ് കേസെടുത്തത്.

ഉയർന്ന ശമ്പളമുള്ള കനേഡിയൻ വിസ വാഗ്ദാനം ചെയ്തു 2017 ൽ ആണ് ഇവരിൽ നിന്ന് നാലു മുതൽ നാലര ലക്ഷം രൂപ വരെ ഇയാൾ കൈക്കലാക്കിയതെന്ന് പൊലീസ് പറഞ്ഞു. ഗൾഫിലുള്ള സുഹൃത്ത് വഴിയാണ് യുവാക്കൾ മജീഷിനെ പരിചയപ്പെട്ടത്. കനേഡിയയിൽ പോകാൻ 13 യുവാക്കളും ഡൽഹിയിൽ എത്തി. രണ്ടുദിവസം കാത്തിരുന്ന ശേഷം ഇയാൾ യുവാക്കളെയും കൂട്ടി ഹൈദരാബാദിൽ എത്തി. ചില പ്രശ്‌നങ്ങൾ ഉണ്ടെന്നും ഒരു മാസം കൂടി കാത്തിരിക്കണമെന്നും പറഞ്ഞതോടെ വിസക്ക് പണം നൽകിയവർ നാട്ടിൽ എത്തുകയും പൊലീസിൽ പരാതി നൽകുകയും ആയിരുന്നു.