ചങ്ങനാശേരി: വാഴൂർ റോഡിൽ നിന്ന് മാർക്കറ്റ് റോഡിലേയ്ക്കുള്ള കാൽനടയാത്രയ്ക്ക് റോഡിന്റെ ഇരുവശവും നടപ്പാതയും കൈയ്യേറിയുള്ള വാഹന പാർക്കിംഗ് തടസം സൃഷ്‌ടിക്കുന്നു. ചങ്ങനാശേരി മാർക്കറ്റ്, മെത്രാപ്പൊലീത്തൻപള്ളി, സെന്റ് ജോസഫ്സ് സ്‌കൂൾ, പൊലീസ് സ്റ്റേഷൻ എന്നിവിടങ്ങളിലേയ്ക്ക് കാൽനടയായും അല്ലാതെയും പോകാൻ നിരവധി ആളുകളാണ് ഈ വഴി ഉപയോഗിക്കുന്നത്. എന്നാൽ അനധികൃത പാർക്കിംഗ് മൂലം കാൽനടയാത്രക്കാർ റോഡിലേയ്ക്ക് ഇറങ്ങി നടക്കേണ്ട സ്ഥിതിയാണ്. ഇത് അപകടസാദ്ധ്യതയും വർദ്ധിപ്പിക്കുന്നുണ്ട്. ഇത്തരത്തിലുള്ള പാർക്കിംഗ് പ്രദേശത്ത് ഗതാഗതക്കുരുക്കും ഉണ്ടാക്കുന്നുണ്ട്. അപകടങ്ങളിൽ മറ്റും തകർന്ന വാഹനങ്ങളും പൊലീസ് സ്റ്റേഷന്റെ മുൻവശത്തു വഴിയരികിലായിട്ടാണ് ഇട്ടിരിക്കുന്നത്. നഗരസഭയുടെ കീഴിലുള്ള ഉപയോഗ ശൂന്യമായികിടക്കുന്ന സ്ഥലത്ത് പൊലീസ് പിടിച്ചെടുക്കുന്ന വാഹനങ്ങൾ പാർക്ക് ചെയ്യുന്നതിന് സൗകര്യം ഒരുക്കുമെന്നു പല തവണ യോഗങ്ങളിൽ തീരുമാനം ഉണ്ടായെങ്കിലും ഇതുവരെ നടപടി ഉണ്ടായിട്ടില്ല. സ്‌കൂൾ തുറന്നതോടെ രാവിലെയും വൈകുന്നേരങ്ങളിലും റോഡിൽ ഗതാഗത കുരുക്ക് രൂക്ഷമാണ്. റോഡിലെ അനധികൃത വാഹനപാർക്കിംഗ് ഒഴിവാക്കാൻ നടപടി സ്വീകരിക്കണമെന്നാണ് കാൽനടയാത്രക്കാരുടെ ആവശ്യം.