അടൂർ: വിവാഹവാഗ്ദാനം നൽകി പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ യുവാവും കൂട്ടാളിയും അറസ്റ്റിൽ. നിലമ്പൂർ വഴിക്കടവ് ചെറുപറമ്പിൽ വീട് ഷിയാസ് (21),​ നിലമ്പൂർ മൊടപൊയ്ക വഴിക്കടവ് തോണിക്കടവിൽ വീട്ടിൽ അൻഷിദ് (23) എന്നിവരെയാണ് അടൂർ പൊലീസ് അറസ്റ്റുചെയ്തത്. അടൂരിലെ സ്വകാര്യ ആയുർവേദ നഴ്സിംഗ് സ്ഥാപനത്തിൽ നിന്ന് കാണാതായ പെൺകുട്ടികളിൽ ഒരാളാണ് പീ‌ഡനത്തിന് ഇരയായത്. മഹാരാഷ്ട്രയിലെ രത്നഗിരിയിൽ നിന്ന് പെൺകുട്ടികളെ കണ്ടെത്തുമ്പോൾ ഈ യുവാക്കളും ഒപ്പമുണ്ടായിരുന്നു. ഇതിൽ ഒരു പെൺകുട്ടിയെയാണ് വിവാഹ വാഗ്ദാനം നൽകി പീഡിപ്പിച്ചത്. തുടർന്ന് പെൺകുട്ടിയേയും കൂട്ടുകാരേയും വശീകരിച്ച് മഹാരാഷ്ട്രയിലേക്ക് തട്ടിക്കൊണ്ടു പോയിയെന്നാണ് കേസ്. അടൂർ കോടതി പ്രതികളെ റിമാൻഡ് ചെയ്തു.