കോട്ടയം: നമ്പർപ്ലേറ്റിലൊളിപ്പിച്ച് തമിഴ്നാട്ടിൽ നിന്ന് കേരളത്തിലേക്ക് കഞ്ചാവ് കടത്ത്. കഞ്ചാവ് കടത്തുന്നതായി സംശയം തോന്നിയതിനെത്തുടർന്ന് നടത്തിയ പരിശോധനയിലാണ്

ബൈക്കിന്റെ പിന്നിലെ നമ്പർപ്ലേറ്റിനുള്ളിൽ പ്രത്യേകമായി ഒളിപ്പിച്ചു വച്ച 250 ഗ്രാം കഞ്ചാവ് കണ്ടെത്തിയത്. എറണാകുളം തൃപ്പൂണിത്തുറ സ്വദേശികളായ തച്ചിരുപറമ്പിൽ ശ്യാം സുന്ദർ (23), മണപ്പാട്ട് ആനന്ദ് (22) എന്നിവരെ അറസ്റ്റുചെയ്തു. എറണാകുളത്ത് സ്വകാര്യ കമ്പനിയിലെ ജീവനക്കാരാണ് ഇരുവരും. സ്വന്തം ആവശ്യത്തിനായി കഞ്ചാവ് കൊണ്ടുവരികയായിരുന്നുവെന്നാണ് ഇവർ എക്സൈസിനോട് പറഞ്ഞത്. 3,500 രൂപയ്ക്കാണ് കാൽ കിലോ കഞ്ചാവ് കമ്പത്തുനിന്ന് വാങ്ങിയതെന്നും ഇവർ പറഞ്ഞു. ഉടുമ്പൻചോല റേഞ്ച് ഇൻസ്‌പെക്ടർ ജി.വിജയകുമാറിന്റെ നേതൃത്വത്തിൽ നടത്തിയ പരിശോധനയിൽ പ്രിവന്റീവ് ഓഫീസർമാരായ പ്രകാശ്, രാധാകൃഷ്ണൻ, സി.ഇ.ഒമാരായ ശശീന്ദ്രൻ, നെബു, അനീഷ്, ഷിയാദ് എന്നിവരും പങ്കെടുത്തു.