ന്യൂഡൽഹി: ലോക്‌സഭാ തിരഞ്ഞെടുപ്പിലെ കനത്ത തോൽവിക്ക് പിന്നാലെ കോൺഗ്രസിന്റെ സോഷ്യൽ മീഡിയ മേധാവിയും സിനിമാതാരവുമായ ദിവ്യ സ്പന്ദന അക്കൗണ്ടുകൾ പൂട്ടി ''മുങ്ങി". തന്റെ ട്വിറ്റർ, ഇൻസ്റ്റഗ്രാം അക്കൗണ്ടുകളാണ് ദിവ്യ ഡിലീറ്റ് ചെയ്തത്. കേന്ദ്ര ധനമന്ത്രിയായി ചുമതലയേറ്റ നിർമ്മല സീതാരാമനെ അഭിനന്ദിച്ച ട്വീറ്റാണ് ദിവ്യ അവസാനമായി പോസ്റ്റ് ചെയ്തത്. ''ഇന്ദിരാഗാന്ധിക്ക് ശേഷം ധനമന്ത്രാലയം കൈകാര്യം ചെയ്യുന്ന വനിതാ മന്ത്രിക്ക് ആശംസ"യെന്നായിരുന്നു ദിവ്യയുടെ ട്വീറ്റ്.

ഇന്നലെ മുതലാണ് ട്വിറ്ററിലും ഇൻസ്റ്റഗ്രാമിലും ദിവ്യ സ്പന്ദനയുടെ അക്കൗണ്ടുകൾ ഇല്ലാതായത്. പ്രധാനമന്ത്രി നരേന്ദ്ര മോദിക്കും സർക്കാരിനുമെതിരെ നിരന്തരം ട്വീറ്റ് ചെയ്തിരുന്ന ദിവ്യ മാണ്ഡ്യയിലെ കോൺഗ്രസിന്റെ മുൻ എം.പിയായിരുന്നു. പിന്നീടാണ് കോൺഗ്രസിന്റെ സോഷ്യൽ മീഡിയ വിഭാഗത്തിന്റെ ചുമതലയേറ്റെടുത്തത്. ട്വിറ്റർ, ഇൻസ്റ്റഗ്രാം അക്കൗണ്ടുകൾ ഡിലീറ്റ് ചെയ്‌തെങ്കിലും ഫേസ്ബുക്ക് അക്കൗണ്ട് ഇപ്പോഴും സജീവമാണ്. കോൺഗ്രസ് ദിവ്യ സ്പന്ദനയെ തത്‌സ്ഥാനത്ത് നിന്ന് നീക്കിയോ എന്ന ചോദ്യവും ഉയരുന്നുണ്ട്.

അതേസമയം, അടുത്ത ഒരു മാസത്തേക്ക് കോൺഗ്രസ് വക്താക്കൾ മാദ്ധ്യമങ്ങളിൽ ചർച്ചയ്ക്ക് പോവുകയോ അഭിപ്രായ പ്രകടനം നടത്തുകയോ ചെയ്യരുതെന്ന് കോൺഗ്രസ് നേതൃത്വം ആവശ്യപ്പെട്ടിരുന്നു. ഇതേ തുടർന്നാണോ ദിവ്യയുടെ പിന്മാറ്റമെന്നും സംശയമുണ്ട്.