ന്യൂഡൽഹി: കഴിഞ്ഞ മേയ് 30നായിരുന്നു നരേന്ദ്ര മോദി ഇന്ത്യയുടെ പ്രധാനമന്ത്രിയായി സത്യപ്രതിജ്ഞ ചെയ്തത്. ക്ഷണിക്കപ്പെട്ട കുറച്ച് അതിഥികൾ ചടങ്ങിന് സാക്ഷ്യം വഹിച്ചു. ബാക്കിയുള്ളവർ ടിവിയിലൂടെ മോദിയുടെ സത്യപ്രതിജ്ഞ കണ്ടു. മുൻ അമേരിക്കൻ പ്രസിഡന്റ് ബരാക് ഒബാമ പോലും ടിവിയിൽ ചടങ്ങ് കണ്ടു എന്ന അവകാശവാദവുമായി കുറച്ച് പേർ രംഗത്തെത്തിയിരുന്നു. അവരുടെ കൈവശം തെളിവായി ടിവിയിൽ മോദിയുടെ സത്യപ്രതിജ്ഞ കാണുന്ന ഒബാമയുടെ ചിത്രവും ഉണ്ടായിരുന്നു.

സച്ചിൻ ജീൻവാൾ എന്ന പേരിലുള്ള ഫേസ്ബുക്ക് അക്കൗണ്ടിലാണ് ഈ ചിത്രം ആദ്യമായി പോസ്റ്റ് ചെയ്തത്. ചിത്രത്തിനൊപ്പം 'ഇതാണ് മോദി ശക്തി അമേരിക്കയിൽ ഒബാമപോലും സത്യപ്രതിജ്ഞ കാണുന്നു' എന്ന അടിക്കുറിപ്പും ഉണ്ടായിരുന്നു.മേയ് 31ന് പോസ്റ്റ് ചെയ്ത ചിത്രം സമൂഹമാദ്ധ്യമങ്ങളിൽ വളരെപ്പെട്ടെന്ന് തന്നെ വൈറലായി. ധാരാളം ആളുകൾ ഈ ചിത്രം ഷെയർ ചെയ്തു. എന്നാലിപ്പോൾ ഈ ചിത്രം വ്യാജമായിരുന്നുവെന്ന് തെളിഞ്ഞിരിക്കുകയാണ്.

ന്യൂയോർക്ക് ടൈംസ് ഫോട്ടോഗ്രാഫറായ ഡൗഗ് മിൽസാണ് ഇതിന്റെ യഥാർത്ഥ ചിത്രമെടുത്തത്. പ്രസിഡന്റായിരുന്ന സമയത്ത് മിനാപൊളിസിലേക്കുള്ള യാത്രക്കിടെ എയർഫോഴ്‌സ്‌ വൺ വിമാനത്തിലിരുന്ന്‌ അമേരിക്ക-ജർമ്മനി ലോകകപ്പ്‌ മത്സരം കാണുന്ന ഒബാമയാണ് യഥാർത്ഥ ചിത്രത്തിലുള്ളത്. 2014 ജൂൺ 26ന് മിൽസ് ഇത് ട്വീറ്റ് ചെയ്‌തിട്ടുണ്ട്. എഡിറ്റ് ചെയ്‌തവർ ഫുട്ബോൾ ചിത്രത്തിന് പകരം മോദി സത്യപ്രതിജ്ഞ ചെയ്യുന്ന ചിത്രം വയ്‌ക്കുകയായിരുന്നു. സത്യം വെളിച്ചത്ത് വന്നതോടെ എഡിറ്റിംഗെന്നൊക്കെ പറഞ്ഞാൽ ദേ ഇങ്ങനെയിരിക്കണമെന്നാണ് സോഷ്യൽ മീഡിയയുടെ ട്രോൾ.

President Obama watches the USA vs Germany World Cup game aboard Air Force One enroute to Minneapolis. #worldcup pic.twitter.com/wfuJvb6hoI

— Doug Mills (@dougmillsnyt) June 26, 2014