ഇന്ത്യൻ സിനിമയ്‌ക്ക് മലയാളത്തിന്റെ അഭിമാനമായി മാറിയേക്കാവുന്ന ചിത്രമാണ് മാമാങ്കം. മെഗാ സ്‌റ്റാർ മമ്മൂട്ടി അടക്കമുള്ള മികച്ച താരങ്ങൾ അണിനിരക്കുന്ന ചിത്രം ആദ്യഘട്ടം മുതൽ തന്നെ വിവാദങ്ങളും സൃഷ്‌ടിച്ചിരുന്നു. അതിനെയെല്ലൊ അതിജീവിച്ച് ഷൂട്ടിംഗ് പുരോഗമിക്കുന്ന ഈ ബിഗ് ബഡ്‌ജറ്റ് സിനിമയുടെ ഫസ്‌റ്റ് ലുക്ക് പോസ്റ്റർ കഴിഞ്ഞ ദിവസം അണിയറപ്രവർത്തകർ പുറത്തുവിടുകയും ചെയ്‌തു.
ഇപ്പോഴിതാ അതുമായി ബന്ധപ്പെട്ട് തന്നെ പലരും തെറ്റിദ്ധരിച്ചുവെന്ന് പറയുകയാണ് നടൻ സുധീർ. പോസ്‌റ്ററിലെ ഉണ്ണിമുകുന്ദനെ താനെന്ന് തെറ്റിദ്ധരിച്ച് സ്വന്തം അചഛന പോലും വിളിച്ചുവെന്നും സുധീർ പറയുന്നു.
സുധീറിന്റെ വാക്കുകൾ-
'ഇന്നലെ മുതൽ ഫോൺ കോളുകളുടെ ബഹളമാണ്. മാമാങ്കത്തിന്റെ ഫ്ര്രസ്ലുക്ക് പോസ്റ്റർ സമൂഹമാധ്യമങ്ങളിലൂടെയും പത്രമാധ്യമങ്ങളിലൂടെയും റിലീസ് ചെയ്തിരുന്നു. അതിൽ മമ്മൂക്കയുടെ കൂടെ നിൽക്കുന്നത് ഞാനാണെന്ന് തെറ്റിദ്ധരിച്ച് നിരവധി ആളുകളാണ് മെസേജ് അയക്കുന്നത്. ഞാനെല്ലാവരെയും തിരുത്തിക്കൊണ്ടിരിക്കുകയാണ്. അത് ഞാനല്ല, നടൻ ഉണ്ണി മുകുന്ദനാണ് മമ്മൂക്കയ്‌ക്കൊപ്പമുള്ളത്.
രസകരമായ കാര്യം ഇതൊന്നുമല്ല, എന്റെ അച്ഛൻ പത്രം കണ്ടതിനു ശേഷം വിളിച്ചു, 'മമ്മൂക്കയുടെ കൂടെ നിന്റെ പടം കണ്ടു, അച്ഛന് സന്തോഷമായി' എന്നു പറഞ്ഞു. അച്ഛനെ വരെ തിരുത്തേണ്ട അവസ്ഥയിലേയ്ക്കു പോയി കാര്യങ്ങൾ. അതുകൊണ്ടാണ് ഇങ്ങനെ ലൈവിൽ വന്നത്.
ഞാനും മാമാങ്കം സിനിമയുടെ ഭാഗമാണ്. ചിത്രത്തിൽ തെറ്റില്ലാത്തൊരു വേഷത്തിൽ അഭിനയിക്കുന്നുണ്ട്. അതിൽ മമ്മൂക്കയോടും പപ്പേട്ടനോടും വേണു സാറിനോടും വലിയ കടപ്പാടുണ്ട്. ഈ സിനിമ മലയാളത്തിന്റെ മാത്രമല്ല ഇന്ത്യൻ സിനിമയുടെ ഭാഗമായി മാറട്ടെ എന്ന് ആശംസിക്കുന്നു.'–സുധീർ പറഞ്ഞു.