ലണ്ടൻ:തള്ളവിരലിൽ ഏറ്റ പരിക്കിനെ തുടർന്ന് ഇന്ത്യൻ ബാറ്റ്സ്‌മാൻ ശിഖർ ധവാൻ ലോകകപ്പ് ക്രിക്കറ്റിലെ ഇന്ത്യൻ ടീമിൽ നിന്നും വിട്ടുനിൽക്കും. ആസ്ട്രേലിയയുമായുള്ള മത്സരത്തിനിടെ ഇടത് തള്ളവിരലിൽ പരിക്കേറ്റതിനെ തുടർന്നാണ് ധവാൻ മൂന്നാഴ്ചത്തേക്ക് ലോകകപ്പിൽ നിന്നും വിട്ടുനിൽക്കുക. എന്നാൽ മത്സരത്തിൽ പരിക്ക് വകവയ്ക്കാതെ 117 റൺസ് നേടി ടീമിനെ വിജയത്തിലേക്ക് എത്തിക്കാൻ ശിഖർ ധവാന് കഴിഞ്ഞിരുന്നു.

ധവാന്റെ തള്ളവിരൽ സ്കാൻ ചെയ്തപ്പോൾ ഒടിവ് കണ്ടെത്തിയിട്ടുണ്ട്. പരിക്കിനെ തുടർന്ന് ഇനി നടക്കാനിരിക്കുന്ന ന്യൂസിലൻഡ്, പാകിസ്ഥാൻ, അഫ്ഗാനിസ്ഥാൻ, വെസ്റ്റ് ഇൻഡീസ്, ഇംഗ്ലണ്ട് എന്നീ രാജ്യങ്ങൾക്കെതിരെയുള്ള ഇന്ത്യയുടെ ലോകകപ്പ് മത്സരങ്ങളിൽ ധവാന് കളിക്കാൻ കഴിയില്ല. നിരവധി മത്സരങ്ങളിൽ ഇന്ത്യയ്‌ക്ക് വേണ്ടി നിർണായക പ്രകടനം കാഴ്‌ച വച്ചിട്ടുള്ള ശിഖർ ധവാന്റെ വിടവ് നികത്തുക ഇന്ത്യൻ ടീമിനെ സംബന്ധിച്ച് ഏറെ വെല്ലുവിളിയാണ്.ശ്രേയസ് അയ്യരോ, ഋഷഭ് പന്തോ ആയിരിക്കും ഇംഗ്ലണ്ടിനെതിരായുള്ള ഇന്ത്യയുടെ മത്സരത്തിൽ ധവാന് പകരം കളിക്കളത്തിൽ ഇറങ്ങുക. ഈ സാഹചര്യത്തിൽ രോഹിത്ത് ശർമയ്‌ക്കൊപ്പം ദിനേശ് കാർത്തിക്കോ വിജയ് ശങ്കറോ ആയിരിക്കും ഇന്ത്യയ്‌ക്ക് വേണ്ടി ഓപ്പണിംഗ് പൊസിഷനിൽ ഇറങ്ങുക. ആസ്ട്രേലിയ്‌ക്കെതിരെയുള്ള മത്സരത്തിൽ ശിഖർ ധവാൻ ആയിരുന്നു മാൻ ഓഫ് ദ മാച്ച്.