തിരുവനന്തപുരം: രണ്ടാം വിവാഹത്തെ കുറിച്ചും അവരുടെ ജീവിതവും അംഗീകരിക്കാൻ ബുദ്ധിമുട്ടുന്ന കേരള സമൂഹത്തിന് മുന്നിൽ ഒരു മകന്റെ ഫേസ്ബുക്ക് കുറിപ്പാണ് ഇപ്പോൾ വെെറലായിക്കൊണ്ടിരിക്കുന്നത്. അമ്മയുടെ രണ്ടാം വിവാഹമായിരുന്നെന്നും ഇത് അംഗീകരിക്കാൻ പറ്റാത്ത ഒരു സമൂഹത്തിൽ സംശയത്തിന്റെയും പുച്ഛത്തിന്റെയും വെറുപ്പിന്റെയും കണ്ണുകൾകൊണ്ട് ആരും ഇങ്ങോട്ട് നോക്കരുതെന്നും അങ്ങനെ നോക്കിയാൽ തന്നെ ഇവിടെ ആരും ചൂളിപ്പോകില്ലെന്നും ഗോകുൽ കുറിക്കുന്നു.

തനിക്ക് വേണ്ടി ജീവിതം മുഴുവൻ മാറ്റിവച്ചത് അമ്മയാണെന്നും അമ്മ ഒരുപാട് അനുഭവിച്ചിട്ടുണ്ടെന്നും എസ്.എഫ്.ഐ കൊട്ടിയം ഏരിയാ സെക്രട്ടറി കൂടിയായ ഗോകുൽ ഫേസ്ബുക്കിൽ കുറിച്ചു. അന്ന് അമ്മയുടെ കയ്യും പിടിച്ചിറങ്ങുമ്പോൾ തീരുമാനിച്ചതാണ് ഇങ്ങനെയൊരു നിമിഷമെന്നും ഗോകുൽ പറയുന്നു.

ഫേസ്ബുക്ക് കുറിപ്പിന്റെ പൂർണരൂപം

അമ്മയുടെ വിവാഹമായിരുന്നു.

ഇങ്ങനെ ഒരു കുറിപ്പ് വേണോ എന്ന് ഒരുപാട് ആലോചിച്ചതാണ്, രണ്ടാം വിവാഹം ഇപ്പോഴും അംഗീകരിക്കാൻ പറ്റാത്ത ആളുകൾ ഉള്ള കാലമാണ്.

സംശയത്തിന്റെയും പുച്ഛത്തിന്റെയും വെറുപ്പിന്റെയും കണ്ണുകൾകൊണ്ട് ആരും ഇങ്ങോട്ട് നോക്കരുത്, അങ്ങനെ നോക്കിയാൽ തന്നെ ഇവിടെ ആരും ചൂളി പോകില്ല..

ജീവിതം മുഴുവൻ എനിക്ക് വേണ്ടി മാറ്റിവെച്ച ഒരു സ്ത്രീ.ദുരന്തമായ ദാമ്പത്യത്തിൽ ഒരുപാട് അനുഭവിച്ചിട്ടുണ്ട്, അടികൊണ്ട് നെറ്റിയിൽ നിന്ന് ചോരയൊലിക്കുമ്പോൾ ഞാൻ ചോദിച്ചിട്ടുണ്ട് എന്തിന് ഇങ്ങനെ സഹിക്കുന്നു എന്ന്?,അന്ന് അമ്മ പറഞ്ഞത് ഓർമ്മയുണ്ട് നിനക്ക് വേണ്ടിയാണ് ഞാൻ ജീവിക്കുന്നത്,ഇനിയും സഹിക്കുമെന്ന്.

അന്ന് ആ വീട്ടിൽ നിന്ന് അമ്മയുടെ കൈപിടിച്ചിറങ്ങിയപ്പോ ഞാൻ തീരുമാനം എടുത്തതാണ് ഈ നിമിഷത്തെ കുറിച്ച്, ഇത് നടത്തുമെന്ന്...
യൗവനം മുഴുവൻ എനിക്കായി മാറ്റിവെച്ച എന്റെ അമ്മക്ക് ഒരുപാട് സ്വപ്നങ്ങളും ഉയരങ്ങളും കീഴടക്കാൻ ഉണ്ട്....കൂടുതൽ ഒന്നും പറയാൻ ആഗ്രഹിക്കുന്നില്ല, ഇങ്ങനെ ഒരു കാര്യം നടന്നത് രഹസ്യമായി വെക്കേണ്ട ആവശ്യമില്ല എന്ന് തോന്നി..

അമ്മ💜 Happy Married Life..