തിരുവനന്തപുരം: മുൻ ആറ്റിങ്ങൽ എം.പിയുടെ കാറിന്റെ ചിത്രവുമായി ബന്ധപ്പെട്ട വിവാദത്തിൽ പ്രതികരണവുമായി കോൺഗ്രസ് യുവ എം.എൽ.എ കെ.സ് ശബരീനാഥൻ രംഗത്ത്. വിവാദത്തിൽ സമ്പത്തിനെ പിന്തുണച്ച് കൊണ്ടാണ് എം.എൽ.എ മുന്നോട്ട് വന്നത്. ഇതേസമയം സമ്പത്തിനെതിരെ വിമർശനങ്ങളും ട്രോളുകളും സോഷ്യൽ മീഡിയയിൽ നിറഞ്ഞിരുന്നു. കോൺഗ്രസ് ലീഗ് നേതാക്കളും ചിത്രം പങ്കുവച്ച് സമ്പത്തിനെതിരെ പരിഹസിച്ച് രംഗത്തെത്തിയിരുന്നു.

താനടക്കമുള്ള രാഷ്ട്രീയപ്രവർത്തകർ ഇത്തരത്തിലുള്ള വ്യാജ പ്രചാരണങ്ങൾക്ക് നിരന്തരം ഇരയാകാറുണ്ടെന്നും ഇത്തരത്തിലുള്ള കാര്യങ്ങൾ ശരിയാണോ എന്ന് ഉറപ്പുവരുത്താതെ പ്രചരിപ്പിക്കുന്നത് നല്ലതല്ലെന്നും ശബരീനാഥൻ ഫേസ്ബുക്കിൽ കുറിക്കുന്നു. പോസ്റ്റ് കണ്ടപ്പോഴേ സാമാന്യയുക്തിക്ക് ചേരാത്തതാണെന്ന് തോന്നിയിരുന്നു. റസ്പോൻസിബിൽ സോഷ്യൽ മീഡിയ എന്നൊരു ക്യാമ്പയിൻ തുടങ്ങുന്നത് നല്ലതായിരിക്കുമെന്ന് എം.എൽ.എ അഭിപ്രായപ്പെടുന്നു.

ഫേസ്ബുക്ക് കുറിപ്പിന്റെ പൂ‍ർണരൂപം

ആറ്റിങ്ങൽ എംപിയായിരുന്ന ശ്രീ സമ്പത്തിന്റെ വാഹനത്തിന്റെ ഒരു ഫോട്ടോ രാവിലെ മുതൽ പ്രചരിക്കുകയാണ്. അത് കണ്ടപ്പോഴേ സാമാന്യയുക്തിക്ക് ചേരാത്തതാണെന്ന് തോന്നിയിരുന്നു. ഈ ചിത്രം ഫോട്ടോഷോപ്പ് ചെയ്തതാണെന്ന് ഇപ്പോൾ അറിയുന്നു.

ഞാനടക്കമുള്ള രാഷ്ട്രീയപ്രവർത്തകർ ഇത്തരത്തിലുള്ള വ്യാജ പ്രചാരണങ്ങൾക്ക് നിരന്തരം ഇരയാകാറുണ്ട്, അതിന്റെ വിഷമം ഉള്ളിലൊതുക്കി പോവുകയാണ് പലപ്പോഴും ചെയ്യുന്നത്.

നമുക്ക് വിഷയങ്ങൾ പൊളിറ്റിക്കലായി ചർച്ച ചെയ്യാം, അതിൽ തെറ്റില്ല. പക്ഷേ ഇത്തരത്തിലുള്ള കാര്യങ്ങൾ ശരിയാണോ എന്ന് ഉറപ്പുവരുത്താതെ പ്രചരിപ്പിക്കുന്നത് നമുക്കാർക്കും ഭൂഷണമല്ല.

Responsible driving എന്നതുപോലെ Responsible social media എന്നൊരു ക്യാമ്പയിൻ തുടങ്ങുന്നത് നല്ലതായിരിക്കും.