കൊല്ലം: പരിമിതമായ സൗകര്യങ്ങളാൽ വീർപ്പുമുട്ടിയിരുന്ന മുണ്ടയ്‌ക്കൽ അഗതി മന്ദിരത്തിന് കൈത്താങ്ങുമായി പ്രമുഖ വ്യവസായിയും ലുലു ഗ്രൂപ്പ് ചെയർമാനുമായ എം.എ. യൂസഫലി. ദുരിത പൂർണമായ ജീവിത സാഹചര്യങ്ങളിൽ നിന്ന്, എം.എ. യൂസഫലിയുടെ സ്‌നേഹസ്‌പർശത്തിന്റെ കരുതലുമായി മുക്തിനേടിയിരിക്കുകയാണ് ഇവിടുത്തെ അന്തേവാസികൾ.

കഴിഞ്ഞ രണ്ടുവർഷം കൊണ്ടാണ് അഗതി മന്ദിരത്തിന്റെ മുഖച്‌ഛായ മാറ്റുന്ന സഹായം യൂസഫലിയിൽ നിന്നുണ്ടായത്. ആദ്യവർഷം അദ്ദേഹം 25 ലക്ഷം രൂപ അനുവദിച്ചതിന് പുറമേ, സ്‌ത്രീകൾക്കും പുരുഷന്മാർക്കുമായി ശൗചാലയം നിർമ്മിച്ചു. അന്തേവാസികൾക്ക് ഭക്ഷണം നൽകാനും പണം ചെലവഴിച്ചു. കെട്ടിടങ്ങൾ നവീകരിക്കാൻ കഴിഞ്ഞവർഷം 25 ലക്ഷം രൂപ കൂടി നൽകി. ഇവിടുത്തെ 114 അന്തേവാസികൾക്കും കിടക്കാൻ കട്ടിലും ഭക്ഷണം കഴിക്കാൻ ഹാളും ഒരുക്കി. ബാക്കിയുള്ള നിർമ്മാണ പ്രവർത്തനങ്ങൾക്കായി കഴിഞ്ഞദിവസം 25 ലക്ഷം രൂപ കൂടി നൽകി.

ലുലു ഗ്രൂപ്പ് റീജിയണൽ ഡയറക്‌ടർ ജോയി ഷഡാനന്ദൻ, പുവർ ഹോം സൊസൈറ്രി സെക്രട്ടറി ഡോ. ഡി. ശ്രീകുമാറിന് 25 ലക്ഷം രൂപയുടെ ചെക്ക് കൈമാറി. ഇതുവരെ എം.എ. യൂസഫലിയുടെ സഹായമായി 75 ലക്ഷം രൂപയാണ് കൈമാറിയത്.