കൊച്ചി: മോഹൻലാലിനെ നായകനാക്കി പൃഥ്വിരാജിന്റെ സംവിധാനത്തിൽ പിറന്ന സൂപ്പർഹിറ്റ് ചിത്രമാണ് ലൂസിഫർ. 50 ദിവസം കൊണ്ട് 200 കോടി രൂപയാണ് ചിത്രം തിയേറ്ററിൽ നിന്നും വാരിയത്. അവസാനം ആരാധകർ കാത്തിരുന്ന ആ വാർത്തയും പുറത്തുവിട്ടു. ലൂസിഫറിന്റെ രണ്ടാം ഭാഗം വരുന്നു. കൊച്ചിയിലെ മോഹൻലാലിന്റെ വീട്ടിൽവച്ച് നടത്തിയ വാർത്താസമ്മേളനത്തിലാണ് ഇക്കാര്യം അണിയറപ്രവർത്തകർ പ്രഖ്യാപിച്ചത്.

മോഹൻലാൽ, തിരക്കഥാകൃത്ത് മുരളി ഗോപി, നിർമ്മാതാവ് ആന്റണി പെരുമ്പാവൂർ എന്നിവരുടെ സാന്നിദ്ധ്യത്തിൽ പൃഥ്വിരാജാണ് ചിത്രത്തിന്റെ പേര് പ്രഖ്യാപിച്ചത്. ലൂസിഫറിൽ കണ്ടതിന്റെ തുടർക്കഥ മാത്രമാകില്ല രണ്ടാം ഭാഗത്തിൽ കാണുകയെന്നു സംവിധായകൻ പൃഥ്വിരാജ് അറിയിച്ചു. ആദ്യ ഭാഗത്തിൽ ഒരു മഞ്ഞ് കട്ടയുടെ മുകൾഭാഗം മാത്രമേ ഉണ്ടായിരുന്നുള്ളൂ എന്നും അതിലേറെ കാണാൻ കിടക്കുന്നുണ്ടെന്നും തിരക്കഥാകൃത്ത് മുരളി ഗോപി വ്യക്തമാക്കി.

എന്നാൽ എന്താണ് എമ്പുരാൻ എന്ന വാക്കിന്റെ അർത്ഥം എന്ന് പൃഥ്വിരാജ് തന്നെ തുറന്ന് പറയുകയാണ്. 'കുറച്ചുമാത്രം ഉപയോഗിക്കുന്നതുകൊണ്ട് ആരും തിരിച്ചറിയാത്ത ഒരു വാക്കാണ് അത്. തമ്പുരാൻ അല്ല എമ്പുരാൻ. അത് തമ്പുരാന്റെയും ദൈവത്തിന്റെയും ഇടയിലുള്ള ഒരു അസ്തിത്വമാണ് (entity). മോർ ദാൻ എ കിംഗ്, ലെസ് ദാൻ എ ഗോഡ്. the overlord എന്നതാണ് അതിന്റെ ശരിയായ അർഥം. പൃഥ്വി വ്യക്തമാക്കി.

ലൂസിഫറിലെ എമ്പുരാനേ എന്ന ഗാനം വളരെയധികം ശ്രദ്ധിക്കപ്പെട്ടിരുന്നു. മുരളി ഗോപി എഴുതി ദീപക് ദേവ് സംഗീതം നൽകിയ ഗാനം ഉഷ ഉതുപ്പാണ് ആലപിച്ചത്.