ചിത്രീകരണത്തിനിടെയുണ്ടായ അപകടത്തിൽ തനിക്ക് കാര്യമായി പരിക്കുകളൊന്നും പറ്റിയിട്ടില്ലെന്ന് വ്യക്തമാക്കി നടൻ ടോവിനോ തോമസ് രംഗത്തെത്തി . ഇൻസ്റ്റാഗ്രാം പോസ്റ്റ് വഴിയാണ് ടോവിനോ ഈ വിവരം തന്റെ ആരാധകരുമായി പങ്കുവെച്ചത്. 'സ്നേഹാന്വേഷണങ്ങൾക്ക് നന്ദി, ആരുടെയൊക്കെയോ പുണ്യം കൊണ്ട് കാര്യമായി ഒന്നും പറ്റിയില്ല. താങ്ക്യൂ ആൾ!!'. ഇങ്ങനെയായിരുന്നു ടോവിനോയുടെ പോസ്റ്റ്. തങ്ങളുടെ പ്രാർത്ഥന കൂടെയുള്ളപ്പോൾ ടോവിനോ 'ഇച്ചായന്‌' ഒന്നും സംഭവിക്കില്ല എന്നാണ് ആരാധകർ കമന്റ് ബോക്സിൽ പറയുന്നത്.

സാന്ദ്ര തോമസ് നിർമ്മിക്കുന്ന 'എടക്കാട് ബറ്റാലിയൻ 06' എന്ന ചിത്രത്തിന്റെ ഷൂട്ടിങിനിടെയാണ് ടോവിനോയ്ക്ക് അപകടമുണ്ടാവുന്നത്. ചിത്രത്തിന്റെ സംഘട്ടന രംഗങ്ങൾ ചിത്രീകരിക്കുമ്പോൾ ടോവിനോയുടെ ശരീരത്തിൽ തീ പടരുകയായിരുന്നു. ഇതിന്റെ വീഡിയോ പുറത്ത് വന്നിട്ടുണ്ട്. യുദ്ധരംഗം എന്ന് തോന്നാവുന്ന സീനിൽ കൈയിൽ തോക്കും പിടിച്ച് നിൽക്കുന്ന ടോവിനോയെ ആണ് കാണുന്നത്.

പിറകിൽ തീ പടർന്ന് പിടിക്കുമ്പോൾ ടോവിനോ പരിഭ്രാന്തനാകുന്നതും വീഡിയോയിൽ കാണാം. സാന്ദ്ര തോമസ് തന്നെയാണ് ഈ വീഡിയോ പുറത്ത് വിട്ടത്. 'സിനിമയോടുള്ള അഭിനിവേശത്തിൽ ഈ മനുഷ്യനെ തടുക്കാനാവില്ല' എന്നും സാന്ദ്ര വീഡിയോ പങ്കുവച്ചുകൊണ്ട് പറയുന്നു.ഡ്യൂപ്പിനെ ഒഴിവാക്കിയാണ് ടോവിനോ ഈ രംഗത്തിലഭിനയിക്കാൻ തയാറായത്.

സ്വപ്‌നേഷ് കെ. നായരാണ് 'എടക്കാട് ബറ്റാലിയൻ 06' സംവിധാനം ചെയ്യുന്നത്. 'തീവണ്ടി'ക്ക് ശേഷം വീണ്ടും സംയുകത മേനോനും ടോവിനോയും വീണ്ടും ഒന്നിക്കുന്നു എന്ന പ്രത്യേകതയും ചിത്രത്തിനുണ്ട്.