ബംഗളൂരു: സർക്കാർ സ്‌കൂളിൽ നിലത്ത് കിടന്നുറങ്ങി സമൂഹ്യമാദ്ധ്യമങ്ങളിൽ താരമായി കർണാടക മുഖ്യമന്ത്രി എച്ച്.ഡി കുമാരസ്വാമി. ഉത്തര കർണാടകയിലെ യദ്ഗിർ ജില്ലയിലെ സന്ദർശനത്തിനിടെയാണ് സംഭവം. വെള്ളിയാഴ്ച ട്രെയിൻ മാർഗം യദ്ഗിറിലെത്തിയ കുമാരസ്വാമി പിന്നീട് 'ഗ്രാമ വാസ്തവ്യ' പരിപാടിയുടെ ഭാഗമായി ചന്ദ്രകി ഗ്രാമത്തിലെത്തുകയായിരുന്നു. ഗ്രാമങ്ങളിൽ താമസിച്ച് ജനങ്ങളുടെ പ്രശ്‌നങ്ങൾ അടുത്തറിയുക എന്നതാണ് ഗ്രാമ വാസ്തവ്യയുടെ ലക്ഷ്യം. 2006-07 കാലഘട്ടത്തിൽ ആദ്യമായി മുഖ്യമന്ത്രിയായപ്പോൾ കുമാരസ്വാമി തുടങ്ങിയ പരിപാടിയാണിത്. രാത്രിയിൽ സ്‌കൂളിലെ വിദ്യാർത്ഥികളോടൊപ്പം ഭക്ഷണം കഴിച്ച കുമാരസ്വാമി നിലത്ത് കിടന്നുറങ്ങുകയും ചെയ്തു. പിന്നീട് ഇതേക്കുറിച്ചുള്ള ചോദ്യത്തിന് ജനങ്ങൾക്കുവേണ്ടി റോഡിൽ കിടന്നുറങ്ങാനും തയ്യാറാണെന്നായിരുന്നു അദ്ദേഹത്തിന്റെ മറുപടി.