കോഴിക്കോട്: സ്വർണക്കടത്തിനെ കുറിച്ച് ഖത്തർ പൊലീസിന് വിവരം കൈമാറിയ നഗരസഭ കൗൺസിലർക്ക് കൊടി സുനിയുടെ ഭീഷണി. കൊടുവള്ളി നഗരസഭ കൗൺസിലർ കോഴിശേരി മജീദിനാണ് ടി.പി ചന്ദ്രശേഖരൻ വധക്കേസിൽ ശിക്ഷയനുഭവിക്കുന്ന പ്രതിയുടെ ഭീഷണി. സംഭവത്തെ തുടർന്ന് ഖത്തർ ജുവലറി ഉടമകൂടിയായ കൗൺസിലർ പൊലീസിന് പരാതി നൽകി.

കൊടുവള്ളി നഗരസഭയിലെ 24ാം വാർഡിലെ മുസ്ലീം ലീഗ് കൗൺസിലറാണ് മജീദ്. നാട്ടിൽവന്നാൽ വച്ചേക്കില്ലെന്നും കുടുംബത്തിന് നാട്ടിൽ നിൽക്കാൻ കഴിയില്ലെന്നും കൊടിസുനി ഭീഷണിപ്പെടുത്തിയെന്നും അദ്ദേഹം പറയുന്നു. ഭീഷണിപ്പെടിത്തിക്കൊണ്ടുള്ള ഫോൺ സംഭാഷണത്തിന്റെ ശബ്ദരേഖയും മജീദ് പുറത്തുവിട്ടിട്ടുണ്ട്. ഈ മേഖലയിൽ കുറേക്കാലമായി കളിക്കുന്നതാണ്, നമുക്ക് കാണേണ്ടി വരും എന്നാണ് ഫോണിൽ വിളിച്ച് കൊടിസുനി ഭീഷണിപ്പെടുത്തിയതെന്ന് മജീദ് പറയുന്നു. ഇതുമായി ബന്ധപ്പെട്ട് ഇന്ത്യൻ എംബസിക്ക് പരാതി നൽകുമെന്നും ഖത്തറിലുള്ള മജീദ് ഒരു സ്വകാര്യ ചാനലിനോട് പറഞ്ഞു.

ഖത്തറിൽ വിദേശികൾക്ക് പൊലീസിന്റെ അനുമതി പത്രമില്ലാതെ സ്വർണം വാങ്ങാനും വിൽക്കാനും കഴിയില്ല. നിയമപരമല്ലാത്ത സ്വർണം വിൽക്കാൻ സഹായിക്കാത്തതിനും ഈ വിവരം പോലീസിനെ അറിയിച്ചതിനുമാണ് കൊടിസുനി ഭീഷണിപ്പെടുത്തിയതെന്നാണ് മജീദ് പറയുന്നത്.