പ്രാവുവളർത്തൽ വെറുമൊരു ഹോബി മാത്രമല്ല, ഇന്ന് പലർക്കും നല്ലൊരു വരുമാന മാർഗം കൂടി തുറന്നു കൊടുക്കുകയാണ് ഈ മേഖല. നാടൻ പ്രാവുകൾ മുതൽ വിദേശയിനങ്ങൾക്ക് വരെ ആവശ്യക്കാരുണ്ടെന്ന കാര്യം പ്രത്യേകം ശ്രദ്ധിക്കണം. ഒരു ജോഡി പ്രാവിന് ആയിരം രൂപ മുതൽ ലക്ഷങ്ങൾ വരെ വിലമതിക്കുന്ന വിവിധയിനങ്ങൾ വിപണിയിൽ ലഭ്യമാണ്.

കൂടൊരുക്കേണ്ടത് എങ്ങനെ
സ്ഥലസൗകര്യം അനുസരിച്ച് കൂടുകൾ തയ്യാറാക്കി പ്രാവ് വളർത്തൽ ആരംഭിക്കാം. അഞ്ചടി നീളവും ഒന്നരയടി വീതിയും ഒന്നരയടി പൊക്കവും സാധാരണ ഗതിയിൽ കൂടുകൾക്കുണ്ടായിരിക്കണം. കൂടാതെ, ചെറിയ ഇരുമ്പ് വലകൾ ഉപയോഗിച്ച് കൂട് സംരക്ഷിക്കാവുന്നതുമാണ്. മാത്രവുമല്ല, കൂട്ടിനുള്ളിൽ മരക്കൊമ്പുകളോ ചില്ലകളോ ഉപയോഗിക്കുന്നതും പ്രാവുകളെ ഏറെ ആകർഷിക്കും. കുഞ്ഞുങ്ങളെ വാങ്ങി വളർത്തി വലുതാക്കി വിൽക്കുകയാണ് പൊതുവേ ഈ മേഖലയിൽ ചെയ്യാറുള്ളത്. ഇണചേർന്ന് 15 മുതൽ 20 ദിവസങ്ങൾക്കു ള്ളിൽ ഇവ മുട്ടയിടും. കൂടിനുള്ളിൽ മണൽ ചട്ടികൾ ഒരുക്കി വച്ചാൽ ഇവയ്ക്ക് മുട്ടയിടാനുള്ള സൗകര്യമായി. ഒന്നിടവിട്ട ദിവസങ്ങളിലായിരിക്കും മുട്ടയിടുക. പകൽ പൂവനും രാത്രി പിടയുമാണ് പൊതുവേ അടയിരിക്കാറുള്ളത്. പതിനെട്ടാം ദിവസം മുട്ട വിരിഞ്ഞ് കുഞ്ഞു പുറത്തു വരും. സാധാരണ ഗതിയിൽ പതിനഞ്ച് മുതൽ ഇരുപത് വർഷം വരെ ആയുസ് പ്രാവുകൾക്കുണ്ടായിരിക്കും.

ശ്രദ്ധിക്കാൻ

പ്രാവുകളെ ആരോഗ്യമുള്ളവരായി നിലനിറുത്താൻ നല്ല ആഹാരം കൊടുക്കേണ്ടതുണ്ട്. കുതിർത്ത ചോളം, പയർ വർഗങ്ങൾ, ഗോതമ്പ്, കപ്പലണ്ടി, നിലക്കടല എന്നിവ തരാതരം ഭക്ഷണമായി നൽകണം. ഇതിനു പുറമേ ചീരയില, മല്ലിയില എന്നിവയും പ്രാവുകൾക്ക് പ്രിയപ്പെട്ടവയാണ്. അതുപോലെ 30 മി.ലിറ്റർ വെള്ളവും ഓരോ പ്രാവിനും നൽകണം. പ്രാവുകൾക്ക് അസുഖം വരാതെ പ്രത്യേകം ശ്രദ്ധിക്കണം. തലതിരിയലാണ് ഇവയിൽ കാണുന്ന പ്രധാന രോഗം. വൈറ്റമിന്റെ കുറവുകൊണ്ടുണ്ടാകുന്ന ഈ രോഗത്തിന് ബി 1 ഗുളിക നൽകിയാൽ പൂർണ ആരോഗ്യവാന്മാരായി തിരിച്ചെത്തും. കൂട്ടിൽ ഒരാൾക്ക് രോഗം ബാധിച്ചാൽ എത്രയും പെട്ടെന്ന് തന്നെ അവയെ കൂട്ടിൽ നിന്നും മാറ്റിവേണം ചികിത്സിക്കേണ്ടത്. അതുപോലെ, ആദ്യമേ തന്നെ കൂടിനുള്ളിൽ മണൽ വിരിച്ച് അതിനു മുകളിൽ പേപ്പർ വിരിച്ചാൽ ദിവസേനയുള്ള വൃത്തിയാക്കൽ എളുപ്പമായിരിക്കും. രണ്ടാഴ്ചയിലൊരിക്കൽ പ്രാവുകളെ മാറ്റി കൂട്ടിൽ അണുനാശിനി തളിക്കണം. കൂടാതെ മഞ്ഞൾപ്പൊടി വിതറുന്നത് ഉറുമ്പ് ശല്യം ഒഴിവാക്കാനും സഹായിക്കും.