വാഷിംഗ്‌ടൺ: റോഡരികിലെ ബാഗിൽ നിന്നും നവജാത ശിശുവിനെ കണ്ടെത്തി. അമേരിക്കയിലെ കമ്മിംഗ്സ്, ജോർജിയയിലാണ് സംഭവം. ഡ്രൈവ് ചെയ്യുന്ന സമയത്ത് വഴിയരികിൽ നിന്നും കുഞ്ഞിന്റെ കരച്ചിൽ കേട്ടയൊരാൾ ജോർജിയ പൊലീസിനെ വിവരമറിയിച്ചു. ഇതിനെ തുടർന്ന് അന്വേഷിച്ചെത്തിയ പൊലീസാണ് കുഞ്ഞിനെ കണ്ടെത്തിയത്. കെട്ടിമുറുക്കിയ നിലയിലായിരുന്നു കുഞ്ഞിനെ പ്ലാസ്റ്റിക് കൂടിനുള്ളിൽ നിന്നും കണ്ടെടുത്തത്.

ഇത് ആരുടെ കുഞ്ഞാണെന്നും, എന്തിനാണ് കുഞ്ഞിനെ ഉപേക്ഷിച്ചതെന്നും സംബന്ധിച്ച് പൊലീസിന് യാതൊരു വിവരവും ഇതുവരെ ലഭിച്ചിട്ടില്ല. കുഞ്ഞിനെ കണ്ടെത്തിയ ബാഗിൽ നിന്നും ഇതിനെ കുറിച്ച് യാതൊരു സൂചനയും കിട്ടിയില്ല. ആരെങ്കിലും അന്വേഷിച്ചെത്തും എന്ന പ്രതീക്ഷയിൽ കുഞ്ഞിനെ കണ്ടെടുക്കുന്നതിന്റെ വീഡിയോ ജോർജിയ പോലീസ് പുറത്തു വിട്ടിട്ടുണ്ട്.

ഏതായാലും തിരിച്ചറിയപ്പെടാത്ത പെൺകുഞ്ഞിന് 'ഇന്ത്യ' എന്ന് പേര് നൽകിയിരിക്കുകയാണ് പൊലീസ്. 'ഇന്ത്യ' തികച്ചും ആരോഗ്യവതിയാണെന്നും പൊലീസ് അറിയിച്ചിട്ടുണ്ട്. പരിസരത്തുള്ള ഗർഭിണികളായ സ്ത്രീകളെ ചുറ്റിപറ്റി അന്വേഷണം നടത്തുകയാണ് ഇവർ. അന്വേഷണത്തെ സഹായിക്കാനായി '#ബേബിഇന്ത്യ' എന്ന ഹാഷ്ടാഗ് ക്യാംപെയിനും ജോർജിയ പൊലീസ് ആരംഭിച്ചിട്ടുണ്ട്.

കുഞ്ഞിനെ കണ്ടെടുത്ത പൊലീസുകാരന്റെ യൂണിഫോമിലുള്ള ക്യാമറയിൽ നിന്നുമുള്ള വീഡിയോ ആണ് പുറത്തുവിട്ടിരിക്കുന്നത്. കുഞ്ഞിനെ കണ്ടെത്തുമ്പോൾ 'നോക്ക് ഈ കുഞ്ഞിനെ, എന്ത് ഓമനയാണവൾ' എന്നും മറ്റും ഈ പൊലീസുകാരൻ പറയുന്നതും വീഡിയോയിൽ വ്യക്തമായി കേൾക്കാം.