അയിരൂർ :ഒടുവിൽ ജില്ലാ ആയുർവേദാശുപത്രിയിലെ ലിഫ്റ്റ് നേരെയായി. നാല് നിലയുള്ള കെട്ടിടത്തിൽ ലിഫ്റ്റില്ലാത്തതിനാൽ ബുദ്ധിമുട്ടിയ രോഗികൾക്കും ജീവനക്കാർ‌ക്കും ആശ്വാസമായി. 50 ലക്ഷം രൂപ ചെലവിൽ ജില്ലാ പഞ്ചായത്താണ് ലിഫ്റ്റ് സ്ഥാപിച്ചത്.
അവശരായ രോഗികളെ വീൽചെയറിലും മറ്റും ചുമന്നാണ് ഇതുവരെ വാർഡുകളിൽ കൊണ്ടുപോയിരുന്നത്. ഒ.പി , ഫാർമസി, ഡോക്ടർമാരുടെ പരിശോധനാമുറി എന്നിവ മാത്രമാണ് താഴത്തെ നിലയിലുള്ളത്. നൂറ് കിടക്കകളുള്ള ആശുപത്രിയിൽ ചികിത്സതേടി എത്തുന്നവർ ഏറെയാണ്.
ഇന്ത്യയ്ക്ക് സ്വാതന്ത്ര്യം ലഭിക്കുന്നതിന് മുമ്പ് കഷായ ആശുപത്രി എന്ന പേരിൽ തുടങ്ങിയ സ്ഥാപനമാണിത്.
ലിഫ്റ്റിന്റെ പ്രവർത്തനോദ്ഘാടനം ജില്ലാ പഞ്ചായത്ത് പ്രസിഡന്റ് അന്നപൂർണാദേവി നിർവഹിച്ചു. വൈസ് പ്രസിഡന്റ് ജോർജ്ജ് മാമ്മൻ കൊണ്ടൂർ അദ്ധ്യക്ഷത വഹിച്ചു. അയിരൂർ ഗ്രാമപഞ്ചായത്ത് പ്രസിഡന്റ് റ്റി.റ്റി.തോമസ്‌കുട്ടി, വൈസ് പ്രസിഡന്റ് വൽസമ്മ തോമസ്, കോയിപ്രം ബ്ലോക്ക് പഞ്ചായത്തംഗം മോളിബാബു , ഗ്രാമപഞ്ചായത്ത് മുൻപ്രസിഡന്റ് പ്രൊഫ.കെ.എ മാത്യു , എച്ച്.എം.സി അംഗങ്ങളായ വിദ്യാധരൻ അമ്പലാത്ത്, സാംകുട്ടി അയ്യക്കാവിൽ, എം.വി.വിദ്യാധരൻ, ചീഫ് മെഡിക്കൽ ഓഫീസർ ഡോ.സൂസൻ പി.ജോൺ എന്നിവർ പ്രസംഗിച്ചു.