ചാ​ത്ത​ന്നൂർ: പൂ​ത​ക്കു​ളം ഗ്രാ​മ​പ​ഞ്ചാ​യ​ത്തിൽ മു​ക്ക​ട ര​ണ്ടാം വാർ​ഡി​ൽ കരടിമുക്കിലെ സേ​വാ​ഗ്രാ​മം വർഷങ്ങളായി പ്രവർത്തനം നിലച്ചതോടെ ചണ്ടി ഡിപ്പോയ്ക്ക് സമാനമാകുന്നു. സേവാഗ്രാമം കെട്ടിടം സ്ഥിതി ചെയ്യുന്ന സ്ഥലത്ത് പ്ളാസ്റ്റിക് ഉൾപ്പെടെയുള്ള മാലിന്യമാണ് ദിവസേന നിക്ഷേപിക്കപ്പെടുന്നത്.

കെട്ടിടവും പരിസരവും കേന്ദ്രീകരിച്ച് സാമൂഹ്യവിരുദ്ധരുടെ ശല്യവും രൂക്ഷമായിട്ടുണ്ട്. മഴക്കാലമായതോടെ മാലിന്യം അ​ഴു​കി സാം​ക്ര​മി​ക രോ​ഗ​ങ്ങൾ പ​ട​രു​ന്ന​ അവ​സ്ഥ​യാണുള്ളതെന്ന് നാ​ട്ടു​കാർ ആ​രോ​പി​ക്കു​ന്നു.

സർ​ക്കാർ ഉ​ത്ത​ര​വ് പ്ര​കാ​രം എ​ല്ലാ ​വാർ​ഡു​ക​ളി​ലും സേ​വാഗ്രാ​മം ഓ​ഫീ​സു​കൾ ആ​രം​ഭി​ക്കു​ന്ന​തി​ന്റെ ഭാ​ഗ​മാ​യാ​ണ് പൂ​ത​ക്കു​ളം ഗ്രാ​മ​പ​ഞ്ചാ​യ​ത്തിലും വാർ‌ഡുകൾ കേന്ദ്രീകരിച്ച് ഓഫീസുകൾ പ്രവർത്തനമാരംഭിച്ചത്. പ​ഞ്ചാ​യ​ത്ത് അം​ഗ​ത്തി​ന്റെ ഓ​ഫീസ് കൂ​ടി​യാ​യാ​ണ് ഗ്രാ​മസേ​വാ കേ​ന്ദ്ര​ങ്ങൾ. പ​ഞ്ചാ​യ​ത്ത് ഭ​ര​ണസ​മി​തി തീ​രു​മാ​ന പ്ര​കാ​രം എ​ല്ലാ മാ​സ​വും ഒ​രു ദി​വ​സം കേന്ദ്രത്തിൽ ഒ​രു ഉ​ദ്യോ​ഗ​സ്ഥ​നെ​ത്തി പ്ര​ദേ​ശ​വാ​സി​ക​ളു​ടെ ക​രം കു​ടി​ശ്ശി​ക പി​രി​വും മ​റ്റു ആ​നു​കൂ​ല്യ​ങ്ങ​ളു​ടെ അ​പേ​ക്ഷ​കൾ സ്വീ​ക​രി​​ക്കു​ക​യും ക്ഷേ​മ പ്ര​വർ​ത്ത​ന​ങ്ങൾ ഏ​കോ​പി​പ്പി​ക്കു​വാൻ നേ​തൃ​ത്വം കൊ​ടു​ക്കേ​ണ്ട​തുമാണ്. എന്നാലിപ്പോൾ രണ്ടാം വാർഡിലുള്ളവർ വിവിധ ആവശ്യങ്ങൾക്കായി പൂതക്കുളം പഞ്ചായത്തിൽ നേരിട്ടെത്തേണ്ട സ്ഥിതിയാണ്.

സേ​വാകേ​ന്ദ്രം ഓഫീസ് പരിസരം വൃത്തിയാക്കി ഓ​ഫീസ് സ്റ്റാ​ഫി​നെ നി​യ​മി​ച്ച് തു​റ​ന്നു പ്ര​വർ​ത്തി​പ്പി​ക്കു​വാൻ പ​ഞ്ചാ​യ​ത്ത് അ​ധി​കൃ​തർ ത​യ്യാ​റാ​വ​ണ​മെ​ന്നാണ് നാ​ട്ടു​കാരുടെ ആ​വ​ശ്യം.