ഗുരുവായൂർ: ഗുരുവായൂർ ദേവസ്വം ആനത്താവളത്തിൽ ആനയിടഞ്ഞു. വടം കെട്ടി ആനയെ തളയ്ക്കുന്നതിനിടെ മറ്റൊരാനയുടെ പാപ്പാന് പരിക്കേറ്റു. ഇന്നലെ രാവിലെ പത്തോടെ ദേവസ്വത്തിലെ ഒറ്റക്കൊമ്പൻ ചന്ദ്രശേഖരനാണ് ഇടഞ്ഞത്. ആനക്കോട്ടയിലെ തെക്കേ അറ്റത്തായി കെട്ടിയിരുന്ന കൊമ്പൻ ചങ്ങല വലിച്ച് പൊട്ടിക്കുകയും തുടർന്ന് പരിസരത്തെ മരങ്ങൾ പിഴുതെറിയുകയും ചെയ്തു. മദപ്പാടിന്റെ ലക്ഷണത്തെ തുടർന്ന് കെട്ടും തറിയിലേക്ക് മാറ്റാനുള്ള ശ്രമത്തിനിടെയാണ് ആന അനുസരണക്കേട് കാട്ടിയത്. ആനയെ തളയ്ക്കാനുള്ള ശ്രമത്തിനിടയിൽ ബാലു എന്ന ആനയുടെ പാപ്പാൻ പാലക്കാട് സ്വദേശി ജ്യോതി പ്രകാശന്റെ കൈ ഒടിഞ്ഞു. വടം കെട്ടി ആനയെ നിയന്ത്രിക്കുന്നതിനിടയിൽ കയറിൽ കുടുങ്ങിയാണ് കൈ ഒടിഞ്ഞത്. പരിക്കുപറ്റിയ പാപ്പാനെ തൃശൂരിലെ സ്വകാര്യ ആശുപത്രിയിൽ പ്രവേശിപ്പിച്ചു...