വെമ്പായം: തേക്കടയിൽ വീട് കുത്തിത്തുറന്ന് വൻ കവർച്ച. സ്വർണവും പണവും ഇലക്ട്രിക് ഉപകരണങ്ങളും വിലപിടിപ്പുള്ള വാച്ചുകളും നഷ്ടപ്പെട്ടു. കാർപോർച്ചിൽ പാർക്ക് ചെയ്തിരുന്ന കാറിന്റെ ചില്ലും തകർത്തു.

മേലേ തേക്കട, മെലൂഹയിൽ ഗിരീഷ്ചന്ദ്രബാബുവിന്റെ വീട്ടിലാണ് പിറക് വശത്തെ വാതിൽ കുത്തിത്തുറന്ന് കവർച്ച നടത്തിയത്. ഗിരീഷ് ചന്ദ്രബാബുവും കുടുംബവും അര കിലോമീറ്റർ അകലെയുള്ള കുടുംബ വീട്ടിൽ നിന്ന് പുലർച്ചെ ഇവിടെ എത്തിയപ്പോഴാണ് മോഷണ വിവരം അറിയുന്നത്.

തുടർന്ന് നടത്തിയ പരിശോധനയിൽ അലമാരയിൽ സൂക്ഷിച്ചിരുന്ന രണ്ടു ലക്ഷം രൂപയും രണ്ടു ലക്ഷം രൂപ വിലപിടിപ്പുള്ള രണ്ടു വാച്ചുകളും മൂന്നു പവൻ വീതമുള്ള രണ്ടു വളകളും ഹോം തിയേറ്ററിന്റെ വൂഫർ ഉൾപ്പെടെയുള്ള സാധനങ്ങളും നഷ്ടപ്പെട്ടു.

ലോക്ക് തുറക്കാൻ ശ്രമിക്കുന്നതിനിടെയാണ് കാറിന്റെ പിറകിലെ ചില്ല് തകർന്നത്.

വട്ടപ്പാറ പൊലീസിൽ വിവരം അറിയിച്ചതിനെത്തുടർന്ന് പൊലീസും ഫോറൻസിക് വിദഗ്ദ്ധരും സ്ഥലത്തെത്തി പരിശോധന നടത്തി. കേസിൽ ഊർജിതമായ അന്വേഷണം ആരംഭിച്ചതായി വട്ടപ്പാറ സർക്കിൾ ഇൻസ്പെക്ടർ ബിജുലാൽ പറഞ്ഞു.