മുടപുരം: ഓട്ടോയിൽ മറന്നുവച്ച പണം ഓട്ടോ ഡ്രൈവർ തിരികെ ഏൽപ്പിച്ച് മാതൃകയായി. ചിറയിൻകീഴിലേക്കുള്ള ഓട്ടോറിക്ഷാ യാത്രയിലാണ് കോളിച്ചിറ സ്വദേശി റാഹില ബീവി 50,000 രൂപ ഓട്ടോയിൽ മറന്നുവച്ചത്. പെരുങ്ങുഴിയിലെ ചിറയിൻകീഴ് കല്ലുവിള വീട്ടിൽ കുമാറിന്റെതായിരുന്നു ഓട്ടോ. സ്റ്റാൻഡിൽ എത്തിയശേഷമാണ് കുമാർ പണമടങ്ങിയ ബാഗ് കണ്ടത്. തുടർന്ന് ചിറയിൻകീഴ് പൊലീസിനെ വിവരമറിയിക്കുകയായിരുന്നു. പൊലീസ് നടത്തിയ അന്വേഷണത്തിൽ ബാഗ് റാഹിലയുടെതാണെന്ന് കണ്ടെത്തുകയും റാഹിലയെ പൊലീസ് സ്റ്റേഷനിൽ വിളിച്ചുവരുത്തുകയും ചെയ്തു. ചിറയിൻകീഴ് എസ്.ഐ സജീവിന്റെയും പൊലീസുകാരുടെയും സാന്നിദ്ധ്യത്തിൽ കുമാർ തുക റാഹിലയ്ക്ക് കൈമാറി.