തിരുവനന്തപുരം: നഴ്‌സുമാരുടെ സംഘടനയായ യുണൈറ്റഡ് നഴ്‌സസ് അസോസിയേഷനിൽ (യു.എൻ.എ) മൂന്നര കോടിയിലധികം രൂപയുടെ ക്രമക്കേട് നടന്നെന്ന പരാതിയിൽ ക്രൈംബ്രാഞ്ച് കേസ് രജിസ്റ്റർ ചെയ്തു. ദേശീയ പ്രസിഡന്റ് ജാസ്മിൻ ഷായാണ് ഒന്നാം പ്രതി. സംസ്ഥാന പ്രസിഡന്റ് ഷോബി ജോസഫ്, ഓഫീസ് ജീവനക്കാരൻ ജിത്തു, ജാസ്മിൻ ഷായുടെ ഡ്രൈവർ നിതിൻ മോഹൻ എന്നിവരാണ് മറ്റു പ്രതികൾ. പ്രത്യേക സംഘമാവും തട്ടിപ്പിനെക്കുറിച്ച് അന്വേഷിക്കുക.
വ്യാജരേഖ ചമയ്ക്കൽ, വഞ്ചനാകുറ്റം, സാമ്പത്തിക തട്ടിപ്പ് എന്നീ വകുപ്പുകൾ ചുമത്തി ക്രൈംബ്രാഞ്ച് ആസ്ഥാനത്താണ് കേസ് രജിസ്റ്റർ ചെയ്തത്. എഫ്.ഐ.ആർ തൃശൂർ കോടതിയിൽ സമർപ്പിക്കും. ക്രൈംബ്രാഞ്ച് മേധാവി ടി.കെ. വിനോദ് കുമാറിന്റെ ശുപാർശയിൽ ഡി.ജി.പി ലോക്നാഥ് ബെഹ്‌റ കേസെടുക്കാൻ ഉത്തരവിട്ടിരുന്നു.
യു.എൻ.എയുടെ ബാങ്ക് അക്കൗണ്ടുകൾ സഹിതം സംഘടനയുടെ മുൻ വൈസ് പ്രസിഡന്റ് സിബി മുകേഷാണ് ഡി.ജി.പിക്ക് പരാതി നൽകിയിരുന്നത്. 2017 ഏപ്രിൽ മുതൽ ഇക്കഴിഞ്ഞ ജനുവരി വരെ അക്കൗണ്ടിലേക്കെത്തിയ മൂന്നര കോടി രൂപ തട്ടിയെടുത്തെന്നാണ് പരാതി. ദേശീയ പ്രസിഡന്റ് ജാസ്മിൻ ഷാ ഉൾപ്പെടെ മൂന്ന് പേരാണ് അക്കൗണ്ടുകൾ കൈകാര്യം ചെയ്തിരുന്നത്. നഴ്‌സുമാരിൽ നിന്ന് പിരിച്ച മാസവരി ഉൾപ്പെടെ സംഘടനയുടെ ബാങ്ക് അക്കൗണ്ടിലുണ്ടായിരുന്ന മൂന്നരക്കോടി അനധികൃതമായി പിൻവലിച്ചെന്നും പരാതിയിലുണ്ട്. പ്രതിമാസം 150 രൂപ വരിസംഖ്യയാണ് നഴ്സുമാർ നൽകുന്നത്. 2017 ഏപ്രിൽ മുതൽ 2019 ജനുവരി 31 വരെ സംഘടനയുടെ പേരിൽ തൃശൂരിലെ സ്വകാര്യ ബാങ്കിൽ മൂന്ന് കോടി 71 ലക്ഷം നിക്ഷേപിച്ചിരുന്നതായും സംഘടനാപ്രവർത്തനങ്ങൾക്കും ഓഫീസ് വാടക ഇനത്തിലുമായി 1.40 കോടി രൂപ ചെലവഴിച്ചതായും രേഖകളുണ്ട്. ബാക്കി 2.20 കോടി രൂപ അക്കൗണ്ടിൽ നിന്ന് സംഘടനയുടെ ദേശീയ പ്രസിഡന്റ് ജാസ്മിൻ ഷായുടെ ഡ്രൈവറടക്കം പല രീതിയിൽ പിൻവലിച്ചിട്ടുണ്ട്. ഇതിന് രേഖകളില്ല. ബാക്കിയുള്ളത് 8,55,000 രൂപ മാത്രം. ഇതുകൂടാതെ 2017 ഏപ്രിൽ മുതൽ അംഗത്വ ഫീസായി ഇരുപതിനായിരം പേർ 500 രൂപ വീതം നൽകിയ കണക്കിൽ 68 ലക്ഷം രൂപ ജില്ലാ കമ്മിറ്റികളും യൂണിറ്റുകളും നൽകിയിട്ടുണ്ട്. ഇത്‌ അക്കൗണ്ടിൽ വന്നിട്ടില്ല. ഇതുൾപ്പെടെ മൂന്നര കോടിയോളം രൂപ തട്ടിയെടുത്തതായാണ് പരാതി.
പരാതി ആദ്യം അന്വേഷിച്ച തൃശൂർ ക്രൈംബ്രാഞ്ച് യൂണിറ്റ് ക്രമക്കേടില്ലെന്ന റിപ്പോർട്ടാണ് നൽകിയത്. പരാതിക്കാരുടെ മൊഴിപോലും രേഖപ്പെടുത്താതെയുള്ള റിപ്പോർട്ട് തള്ളണമെന്നാവശ്യപ്പെട്ട് സിബി വീണ്ടും ക്രൈംബ്രാഞ്ച് മേധാവിയെ സമീപിച്ചതോടെ അന്വേഷണം തിരുവനന്തപുരം യൂണിറ്റിന് കൈമാറിയത്. ക്രൈംബ്രാഞ്ച് അന്വേഷണം നടക്കുന്നതിനിടെ, തൃശൂരിലെ ഓഫീസിൽ നിന്നു രേഖകൾ മോഷണം പോയെന്ന് കാട്ടി തൃശൂർ സിറ്റി പൊലീസ് കമ്മിഷണർക്ക് യു.എൻ.എ ഭാരവാഹികൾ പരാതി നൽകിയിരുന്നു. ഈ പരാതിയിലും അന്വേഷണം പുരോഗമിക്കുകയാണ്. ദേശീയ പ്രസിഡന്റ് ജാസ്മിൻ ഷാ അന്വേഷണവുമായി സഹകരിക്കുന്നില്ലെന്നും കേസെടുത്ത് അന്വേഷിച്ചാലേ സത്യം കണ്ടെത്താനാവൂ എന്നും ക്രൈംബ്രാഞ്ച് മേധാവിയുടെ ശുപാർശയിലുണ്ടായിരുന്നു.