ആ​റ്റിങ്ങൽ: കെ.എസ്.ഇ.ബി ഓഫീസിൽ കയറി സബ് എൻജിനിയറെ മർദ്ദിച്ച കേസിൽ രണ്ടുപേർകൂടി പിടിയിൽ. വീരളം ചെറുവിള വീട്ടിൽ അഭിലാഷ് (23)​,​ വീരളം കല്ലിൻമൂട് വീട്ടിൽ ശരത് (20)​ എന്നിവരാണ് പിടിയിലായത്. ഈ കേസിൽ ആ​റ്റിങ്ങൽ പച്ചംകുളം രേവതിയിൽ മോനി എസ്. പ്രസാദ് (20)സംഭവ ദിവസംതന്നെ അറസ്റ്റിലായിരുന്നു.

ഞായറാഴ്ച രാത്രി 10 ന് സബ് എൻജിനിയർ ശ്യാമപ്രസാദിനാണ് (53) മർദ്ദനമേ​റ്റത്.വൈദ്യുതി മുടങ്ങിയതിൽ പ്രതിഷേധിച്ച് ഓഫീസിലെത്തിയ ഒരു സംഘം ബഹളമുണ്ടാക്കുകയും മോനിയും അഭിലാഷും ശരത്തും ഓഫീസിനകത്തു കയറി ആക്രമിക്കുകയുമായിരുന്നെന്ന് പൊലീസ് പറഞ്ഞു. കനത്തമഴയും കാ​റ്റും കാരണം പലയിടത്തും മരങ്ങൾ ഒടിഞ്ഞ് ലൈനിൽ വീണതിനാൽ വൈദ്യുതി വിതരണം തടസപ്പെട്ടിരുന്നു. ഇത് ഉടൻ ശരിയാക്കുമെന്നു പറഞ്ഞെങ്കിലും ഇവർ സബ് എൻജിനിയറെ മർദ്ദിക്കുകയായിരുന്നു. രാത്രിയിൽ ജോലി നടക്കുന്നതിനിടെയാണ് അക്രമണം. പ്രതികളെ കോടതിയിൽ ഹാജരാക്കിയതായി എസ്.ഐ ശ്യാം പറഞ്ഞു.