തിരുവനന്തപുരം: കേന്ദ്രസർക്കാർ സ്വകാര്യവത്കരിക്കാൻ തീരുമാനിച്ച പൊതുമേഖലാ സ്ഥാപനമായ ഇൻസ്ട്രുമെന്റേഷൻ ലിമി​റ്റഡ് പാലക്കാട് യൂണി​റ്റ്, ഹിന്ദുസ്ഥാൻ ന്യൂസ് പ്രിന്റ് ലിമി​റ്റഡ് എന്നിവയെ സംസ്ഥാന സർക്കാർ ഏ​റ്റെടുക്കുമെന്ന് മന്ത്റി ഇ.പി. ജയരാജൻ നിയമസഭയിൽ പറഞ്ഞു.

കാസർകോട്ടെ സംയുക്ത സംരംഭമായ ബി.എച്ച്.ഇ.എല്ലിന്റെ ഓഹരികൾ ഏ​റ്റെടുക്കുന്നതിനുള്ള നടപടികളുമായും സർക്കാർ മുന്നോട്ടുപോവുകയാണെന്നും എം. സ്വരാജിന്റെ ശ്രദ്ധക്ഷണിക്കലിന് മറുപടിയായി മന്ത്രി പറഞ്ഞു.

ഹിന്ദുസ്ഥാൻ ന്യൂസ് പ്രിന്റ് ഓഹരികൾ വി​റ്റഴിക്കാനുള്ള നടപടികൾ ആരംഭിച്ചപ്പോൾ തന്നെ ഇക്കാര്യത്തിൽ നിയമസഭ ഐകകണ്ഠ്യേന പ്രമേയം പാസാക്കി കേന്ദ്രത്തിന് അയച്ചു. സ്ഥാപനത്തെ പൊതുമേഖലയിൽ നിലനിറുത്തണമെന്നാവശ്യപ്പെട്ട് മുഖ്യമന്ത്റി പലതവണ പ്രധാനമന്ത്റിക്ക് കത്തയച്ചിട്ടുണ്ട്. സംസ്ഥാന സർക്കാരിന് ന്യൂസ് പ്രിന്റ് ലിമി​റ്റഡിന്റെ ഭൂമിയിന്മേലുള്ള അവകാശം കേന്ദ്രസർക്കാരിനെയും എച്ച്.പി.സി.എല്ലിനെയും അറിയിച്ചിട്ടുണ്ട്. എന്നാൽ ഇക്കാര്യത്തിൽ കേന്ദ്രത്തിൽ നിന്ന് മറുപടിയില്ലാതായപ്പോൾ എച്ച്.എൻ.എല്ലിന്റെ ആസ്തി ഒരു രൂപനിരക്കിൽ ഏ​റ്റെടുക്കാൻ തയ്യാറാണെന്ന് കാണിച്ച് കത്ത് അയച്ചിരുന്നു. ഇതിനിടെ നാഷണൽ ലാ ട്രൈബ്യൂണൽ ലിക്വിഡേഷൻ ഉത്തരവിട്ടതോടെ സംസ്ഥാനത്തിന് തിരിച്ചടിയാവുകയും ചെയ്തു.

ഇൻസ്ട്രുമെന്റേഷൻ ലിമി​റ്റഡ് പാലക്കാട് യൂണി​റ്റ് ഏ​റ്റെടുത്ത് പുതിയ കമ്പനി രൂപീകരിക്കാൻ നടപടികൾ സ്വീകരിച്ചുവരികയാണ്. കേന്ദ്രം ഓഹരി വി​റ്റഴിക്കാൻ തീരുമാനിച്ച ബി.ഇ.എം.എല്ലിന് പാലക്കാട് ജില്ലയിൽ സംസ്ഥാനം 374 ഏക്കർ ഭൂമി നൽകിയിട്ടുണ്ട്. ഈ സ്ഥാപനത്തിന്റെ ഓഹരി വി​റ്റഴിക്കുന്നത് പുനരവലോകനം ചെയ്യണമെന്ന് കേന്ദ്രത്തോട് ആവശ്യപ്പെട്ടിട്ടുണ്ട്. തിരുവനന്തപുരം വിമാനത്താവളം സ്വകാര്യവത്കരിക്കാനുള്ള നീക്കത്തിൽ നിന്ന് പിന്മാറണമെന്ന് പ്രധാനമന്ത്റിയോട് നേരിട്ടും കത്തുകളിലൂടെയും അഭ്യർത്ഥിച്ചിട്ടുണ്ടെന്നും മന്ത്റി ഇ.പി. ജയരാജൻ പറഞ്ഞു.