തിരുവനന്തപുരം: യശ്ശശരീരനായ ഒളിമ്പ്യൻ സുരേഷ്ബാബുവിന്റെ പേരിലുള്ള ഒളിമ്പ്യൻ അവാർഡിന് മാനുവൽ ഫ്രെഡറിക്കിനെ തിരഞ്ഞെടുത്തു. 1972 ൽ മ്യൂണിക് ഒളിമ്പിക്സിൽ വെങ്കല മെഡൽ നേടിയ ഹോക്കി ടീം അംഗമാണ് മാനുവൽ. 50,​000 രൂപയും പ്രശസ്തിപത്രവുമടങ്ങുന്നതാണ് പുരസ്കാരം.

കായിക രംഗത്തെ പത്രപ്രവർത്തക അവാർഡിന് ഏഷ്യാനെറ്റ് ചീഫ് കോ-ഓർഡിനേറ്റിംഗ് എഡിറ്റർ അനിൽ അടൂർ അർഹനായി. മറ്റ് അവാർഡുകൾ- ദൃശ്യമാദ്ധ്യമം റിപ്പോർട്ടിംഗ്- സി.ജി. അരുൺ സിംഗ് (മനോരമ ടി.വി)​,​ കാമറ- പ്രവീൺ എസ്.എസ് (ന്യൂസ്18)​,​ അച്ചടി മാദ്ധ്യമം റിപ്പോർട്ടിംഗ് - പി.ജെ.ജോസ് (മാതൃഭൂമി)​,​ ഫോട്ടോഗ്രാഫർ - ഹാരിസ് കുറ്റിപ്പുറം (മാധ്യമം)​. 23ന് കവടിയാർ സ്ക്വയറിൽ രാവിലെ 7.45ന് നടക്കുന്ന ഒളിമ്പിക് ദിനാചരണ സമ്മേളനത്തിൽ വച്ച് പുരസ്കാരങ്ങൾ വിതരണം ചെയ്യും. ദിനാചരണ പരിപാടികൾ ഗവർണർ ജസ്റ്റിസ് പി.സദാശിവം ഉദ്ഘാടനം ചെയ്യുമെന്ന് സംഘാടക സമിതി ചെയർമാൻ വി.സുനിൽകുമാർ,​ സെക്രട്ടറി എസ്.രാജീവ് എന്നിവർ വാർത്താസമ്മേളനത്തിൽ അറിയിച്ചു.