കല്ലമ്പലം: ഞെക്കാട് വൊക്കേഷണൽ ഹയർസെക്കൻഡറി സ്കൂളിലെ ഈ വർഷത്തെ വായനാ മാസാചരണത്തിന് തുടക്കമായി. നവീകരിച്ച സ്കൂൾ ലൈബ്രറിയുടെ ഉദ്ഘാടനത്തോടെയാണ് വായനാ മാസാചരണം ആരംഭിച്ചത്. പ്രശസ്ത കവിയും സ്കൂളിലെ പൂർവാദ്ധ്യാപകനുമായ പ്രൊഫ. കുമ്മിൾ സുകുമാരൻ നവീകരിച്ച ലൈബ്രറിയുടെ ഉദ്ഘാടനം നിർവഹിച്ചു. സാഹിത്യകാരനും സ്കൂളിലെ പൂർവ അദ്ധ്യാപകനുമായ എ.വി. ബാഹുലേയനാണ് വായന മാസാചരണം ഉദ്ഘാടനം ചെയ്തത്. പുസ്തകാസ്വാദനം, സാഹിത്യ ശില്പശാല, പതിപ്പ് തയ്യാറാക്കൽ, സാഹിത്യ ക്വിസ്, വായന ആപ്തവാക്യങ്ങൾ കണ്ടെത്തൽ, സാഹിത്യ രചനാ മത്സരങ്ങൾ, പുസ്തക ചർച്ച, പുസ്തക പ്രദർശനം, ഗ്രന്ഥശാലാ സന്ദർശനം എന്നിങ്ങനെ വൈവിധ്യമാർന്ന പരിപാടികളാണ് വായനാ മാസത്തിൽ കുട്ടികൾക്ക് വേണ്ടി സംഘടിപ്പിക്കുന്നത്. സാഹിത്യ രംഗത്ത് പ്രശസ്തരും പൂർവാദ്ധ്യാപകരുമായ കുമിൾ സുകുമാരനെയും എ.വി. ബാഹുലേയനെയും ചടങ്ങിൽ ആദരിച്ചു. ഹെഡ്മാസ്റ്റർ കെ.കെ. സജീവ്, പി.ടി.എ പ്രസിഡന്റ് ഷാജികുമാർ, ഹയർസെക്കൻഡറി പ്രിൻസിപ്പൽ ആർ.പി. ദിലീപ്, വി.എച്ച്.എസ്.ഇ പ്രിൻസിപ്പൽ എം.ആർ. മധു, ഡെപ്യൂട്ടി ഹെഡ്മിസ്ട്രസ് സുമ എസ്, എസ്.എം.സി ചെയർമാൻ പ്രമീള ചന്ദ്രൻ, സ്റ്റാഫ് സെക്രട്ടറി ഗോപകുമാർ, ഉല്ലാസ് മുഹമ്മദ് എന്നിവർ സംസാരിച്ചു.