തിരുവനന്തപുരം: മിൽമയുടെ 90 ദിവസം വരെ കേടുകൂടാതെയിരിക്കുന്ന ലോംഗ് ലൈഫ് പാൽ വിപണിയിലെത്തി. അരലിറ്റർ പാക്കറ്റിന് വില 25 രൂപ. നിയമസഭാ മെമ്പേഴ്സ് ലോഞ്ചിൽ നടന്ന ചടങ്ങിൽ സ്‌പീക്കർ പി. ശ്രീരാമകൃഷ്‌ണനും മന്ത്രി കെ. രാജുവും ചേർന്ന് വിപണനോദ്ഘാടനം നിർവഹിച്ചു. മന്ത്രിമാരായ ഇ. ചന്ദ്രശേഖരൻ, ജെ. മെഴ്സിക്കുട്ടി അമ്മ, പി. തിലോത്തമൻ, കെ.സി. ജോസഫ് എം.എൽ.എ., മിൽമ ചെയർമാൻ പി.എ. ബാലൻ മാസ്‌റ്റർ തുടങ്ങിയവർ സംബന്ധിച്ചു. മിൽമ മലബാർ മേഖലാ യൂണിയൻ പുതുതായി കണ്ണൂർ ശ്രീകണ്ഠാപുരത്ത് സ്ഥാപിച്ച മലയോര ഡയറിയിൽ ഉത്പാദിപ്പിക്കുന്ന യു.എച്ച്.ടി പാൽ കേരളത്തിലെ ആദ്യ സംരംഭമാണ്.